Өфөлә «Онотолоуға хоҡуғы юҡ. Бөйөк Еңеүҙең 80 йыллығына» күргәҙмәһе асылды

Экспозиция нигеҙендә Рәсәй Федерацияһы Президенты Владимир Путин ҡушыуы буйынса Дәүләт тарихи музейы әҙерләгән шул уҡ исемле тарихи-документаль күргәҙмә ята. Проекттың цифрлы версияһында цифрлы архив документтары, уникаль музей әйберҙәре һәм һирәк артефакттар күрһәтелгән. Улар Бөйөк Ватан һуғышының төп мәлдәрен  — 1941 йылдың 22 июнендәге фажиғәле иртәнән алып, нацистик Германия һәм уның союздаштары ғәскәрҙәре СССР территорияһына баҫып ингәндән алып, 1945 йылдың 24 июнендә Ҡыҙыл майҙанда еңеү Парадына тиклем асыҡ күрһәтә, ул һуғыш тамамланыу символына әүерелә.

Өфөләге мультимедиа тарихи паркының фәнни йүнәлеше етәксеһе, тарих фәндәре докторы, Өфө фән һәм технологиялар университеты профессоры Рөстәм Хәзиев һөйләүенсә, экспозиция өҫтөндә эшләүгә Рәсәй һәм Белоруссияла федераль, төбәк һәм ведомство әһәмиәтендәге 50-нән ашыу архив һәм музей эксперттары йәлеп ителгән.

Уның һүҙҙәренсә, күргәҙмәлә меңдән ашыу экспонат, шул иҫәптән 400-ҙән ашыу архив документы бар. Уларҙың күбеһе тәүге тапҡыр фәнни берләшмә тарафынан өйрәнелә.

Тикшеренеүсе, тарихи материалдарҙың бындай киң йыйылмаһы һуғыш ваҡытында илдең күп милләтле халҡына төшкән һынауҙарҙы яңыса аңларға мөмкинлек бирәсәк, тигән фекерен белдерә. Ул күргәҙмәнең һәр килеүселә тәрән эмоциялар тыуҙырасағын һыҙыҡ өҫтөнә алды.

Күргәҙмә ун бүлектән тора: «СССР-ға һөжүм» «Бөтәһе лә фронт өсөн! Барыһы ла Еңеү өсөн!», «Ленинград блокадаһы», «Партизан хәрәкәте», «Бер аҙым да артҡа!», «Ғәҙәти нацизм», «Дошманды СССР территорияһынан ҡыуыу, «Бөйөк Ватан һуғышы геройҙары», «Европаны азат итеү», «Берлинды штурмлау. Еңеү!».

Милли тарихтың фажиғәле һәм героик бите менән танышыуҙың дауамы булып «Көт мине, Ағиҙел...» күргәҙмәһе тора, ул төп экспозицияны тулыландыра. Был проект Башҡортостандың дөйөм халыҡ еңеүенә индергән өлөшөнә арналған һәм төбәктең һуғышта ҡатнашыуының аҙ билдәле эпизодтарын аса.

«Алға-Патриот» йәмәғәт патриотик хәрәкәте етәксеһе Ринат Хәбиров күргәҙмәнең айырыуса әһәмиәтле булыуын  билдәләне. Ул, хәҙерге быуындың ата — бабаларының батырлығы тураһында тарихи хәтерҙе һаҡлау өсөн яуаплы икәнен иҫкә төшөрҙө. Хәбиров Өфө һәм бөтә республика халҡы күргәҙмәгә ҡыҙыҡһыныу күрһәтер, унан белем алыр һәм Бөйөк Еңеүҙең ысын вариҫтары тип аталыу хоҡуғы тураһында мөһим йәмәғәт дискуссияларында үҙҙәре өсөн аргументтар табыр тигән ышаныс белдерҙе. 

Инеү ирекле.