Өфөлә 1200 °C тиклем йылытыу өсөн уникаль ТЭН уйлап табылды

Рәсәй баҙарында стандарт ТЭН-дар ғәҙәттә 700°C иҫәпләнгән, был эҫегә сыҙамлы металдарҙы термоэшкәртеү өсөн етерлек түгел. Шуға күрә предприятиеларға ҙур мейестәр ҡулланырға тура килә, был процестарҙы ҡатмарлаштыра һәм ҡиммәтләндерә. Өфө инженерҙары был проблеманы үҙенсәлекле конструкция һәм диэлектрик тултырғыстың уникаль составы арҡаһында хәл итте.

Эшкәртеүселәр әйтеүенсә, уларҙың составы донъя аналогтарынан айырыла, был киләсәктә температура сиген 1600°C тиклем күтәрергә мөмкинлек бирәсәк.Компакт һәм ҡеүәтле йылытҡыстарҙы теләһә ниндәй геометрияға яраҡлаштырырға мөмкин. Улар нефть-газ тармағында, машиналар эшләүҙә һәм авиатөҙөлөштә ҡулланылыш табасаҡ, мәҫәлән, титан иретмәләрен формалаштырыу һәм тутыҡмай торған термик эшкәртеү өсөн.

«Юғары температуралы ТЭН-дарҙы эшләү - ул фәнни компетенцияларҙың һәм производство һорауҙарының конкрет мәсьәләләрҙе хәл итеү өсөн берләшеүенең миҫалы. Ғалимдарҙың теориянан реаль һынауҙарға һәм сәнәғәт сығарылышын әҙерләүгә күскәнлеге мөһим», - тип билдәләне сәнәғәт, энергетика министры урынбаҫары Эдуард Мостафин.

Проект «Өҫтөнлөк-2030» программаһы сиктәрендә тормошҡа ашырыла. Хәҙер команда уникаль йылытҡыстарҙы сериялы етештереүҙе башлау өсөн технологик линия әҙерләй.