Башҡортостан «Урал аръяғы»VIII Бөтә Рәсәй инвестиция һабантуйына әҙерләнә

- Быйыл федераль власть органдары вәкилдәре, атап әйткәндә, АСИ-ның генераль директоры Светлана Чупшева ҡатнашыуын раҫланы. Инвестиция һабантуйы сиктәрендә тәүге тапҡыр «Йәшмә йәне» халыҡ-ара халыҡ-художество кәсептәре фестивале үтәсәк, уның барышында Сибай Бөтә донъя һөнәрҙәр советының рәсми сертификатын аласаҡ. Был документты Көньяҡ Африканан WCC вице-президенты Надя Меер шәхсән үҙе тапшырасаҡ – был беҙҙең төбәктең бөтә донъяға танылыуы буласаҡ. Бындай юғары ҡунаҡтарҙың булыуы республикаға ҡыҙыҡһыныуҙың артыуын раҫлай һәм халыҡ-ара кооперация өсөн яңы офоҡтар аса, - тип билдәләне Башҡортостан Республикаһының тышҡы иҡтисади бәйләнештәр һәм конгресс эшмәкәрлеге министры Маргарита Болычева.

Ведомствола билдәләүҙәренсә, сит ил делегацияларының килеүе көтөлә.

Беларусь Республикаһынан идарасылар һәм эшҡыуарҙар делегацияһы составында «Белая Русь» партияһының Минск ҡалаһы Первомайский район бүлексәһе рәйесе, партия инициативаларының Йәштәр үҙәге етәксеһе Артем Груша, шулай уҡ алдынғы предприятиеларҙың топ-менеджерҙары - ААЙ «Минск һөт заводы» һәм ААЙ «Свитанак» киләсәк. Белорус яғы ҡатнашлығында «Партнерлыҡ ғәмәлдә: Башҡортостан Республикаһының һәм Беларусь Республикаһының сауҙа перспективалары» эшлекле секцияһы Рәсәй баҙарында белорус тауарҙарын һатыуҙы арттырыуға, ағымдағы конъюнктураны анализлауға һәм брендтарҙы алға этәреүҙең уңышлы маркетинг стратегияларына арналасаҡ.

«Урал аръяғы»ның традицион төрөк секцияһы – «Рәсәй Федерацияһы менән Төркиә Республикаһы араһында сауҙа-иҡтисади мөнәсәбәттәрҙе үҫтереүҙә тармаҡ һәм бизнес-берләшмәләрҙең роле» – быйыл ике яҡлы бәйләнештәрҙе нығытыуҙа бизнес-берләшмәләрҙең роленә иғтибарҙы йүнәлтәсәк. Модератор булып «Рәсәй-төрөк диалогы» ассоциацияһы вице-президенты Мария Суворова, Рәсәй-төрөк эшҡыуарҙары ассоциацияһы Президенты (RTIB) Әхмәт Эрдем Аджай (on-line), Рәсәй-төрөк диалогы ассоциацияһы Президенты Арсен Әйүпов, Mersy Gıda Demirçelik Sanayi ve Ticaret Anonim Şirketi баш инженеры Джемалеттин Софуоглу, «Траксем» яуаплылығы сикләнгән йәмғиәте директоры Илгиз Ханнанов.

Ҡаҙағстан Республикаһы делегацияһы составында: Ҡаҙағстандың Экспорт-кредит агентлығы, AstanaInvest, «Akmol Holding» дәүләт компанияһы, Эшкәртеү сәнәғәте союзы вәкилдәре, «Беренсе мультимодаль Компания» яуаплылығы сикләнгән йәмғиәтенең логистик провайдеры, шулай уҡ логистика, технологиялар һәм ресурстар өлкәһендәге компаниялар директорҙары. Көн тәртибендә: инвестиция хеҙмәттәшлеге, эшкәртеү сәнәғәте һәм мультимодаль ташыуҙар темалары. Башҡортостандың ауыл хужалығы продукцияһын Ҡаҙағстан баҙарына экспортлау, халыҡ-ара сауҙаны, логистиканы һәм экспорт инфраструктураһын үҫтереү, яңы йәшелсә-емеш продукцияһын һәм тимер юл хәрәкәтсән составы өсөн запас частар һәм комплектлаусы әйберҙәр менән тәьмин итеүҙе ойоштороу өлкәһендә килешеүҙәргә ҡул ҡуйырға ниәтләйбеҙ.

Быйыл Инвестиция һабантуйы сиктәрендә тәүге тапҡыр «Йәшмә йәне» халыҡ-ара халыҡ-художество кәсептәре һәм һөнәрҙәре фестивале уҙғарыла, унда оҫталар һәм Үзбәкстан Республикаһының академик берләшмәһе вәкилдәре делегацияһы ҡатнашасаҡ. Ассоциация начальнигы Уктирбәк Аррабоев етәкселегендәге «Хунарманд» ассоциацияһының Андижан өлкә идаралығы вәкилдәре, ассоциация ағзалары (һөнәрселәр), шулай уҡ К.Бехзод исемендәге милли сәнғәт һәм дизайн институтының беренсе проректоры Равшан Юнысов һәм кафедра мөдире Зөһрә Досметова килеүе көтөлә.

Форумдың эшлекле сессиялары дуҫ илдәр менән партнерлыҡ мөнәсәбәттәрен үҫтереүгә, инвестициялар йәлеп итеүгә, бәләкәй ҺӘМ урта эшҡыуарлыҡтың төбәк-ара кооперацияһына, шулай уҡ йылдың төп темаһы – «Еңеү иҡтисады» сиктәрендә импортты алмаштырыу һәм оборона-сәнәғәт комплексы ихтыяждары өсөн кооперация темаларына арналасаҡ.

Белешмә:

«Урал аръяғы» инвестиция һабантуйы һигеҙенсе тапҡыр үткәрелә. 2025 йылда форум Рәсәйҙең 28 төбәгенән һәм 10 илдән 2000-дән ашыу ҡатнашыусыны йыйҙы, 30 миллиард һумға 17 килешеүгә ҡул ҡуйылды. Сараны ойоштороусылар - Башҡортостандың Тышҡы иҡтисади бәйләнештәр Һәм конгресс эшмәкәрлеге министрлығы, Башҡортостан Республикаһы Сәнәғәт, энергетика һәм инновациялар министрлығы, Сибай хакимиәте, «Ағиҙел» БХП ДУП-ы һәм «Орнамент» ассоциацияһы.