Радий Хәбиров Р-240 трассаһын яҡтыртыу менән бәйле хәлде тәнҡитләне

Башҡортостан башлығы Радий Хәбиров 13 июлдә Башҡортостан республика менән идара итеү үҙәгендә үткән оператив кәңәшмәлә Р‑240 трассаһын яҡтыртыу менән бәйле хәлде тәнҡитләне.

«Беҙ бында шау-шыу ҡуптарҙыҡ, бәхәсләштек, унда яҡтылыҡ тураһында хәрәкәт башландымы? Хәҙер бер генә юл бригадаһын да күрмәнем», - тип белдерҙе төбәк етәксеһе.

Башҡортостан хөкүмәте вице-премьеры Рөстәм Ғәзизов эштең бер нисә этапта барыуын һәм көҙгөһөн тамамланырға тейешлеген аңлатты.

«Беҙ ике этапта һөйләшеп килештек. Беренсе этап — улар (эш башҡарыусылар) 1 августа доклад яһай, икенсе этап — улар сентябрҙә яҡтыртыу буйынса бөтә эштәрҙе тамамлай, - тип хәбәр итте ул. -Өлөшләтә муфталарҙы алмаштырыу, ҡайҙалыр кабель алмаштырыу талап ителә. Йәғни монтажлауҙа яңы етешһеҙлектәрҙе асыҡлайҙар, уларҙы бөтөрәсәктәр».

Радий Хәбиров 5 октябрҙә кәңәшмәлә эштәрҙе тамамлау тураһында һуңғы доклад иғлан ителергә тейешлеген белдерҙе. Әгәр эштәр тамамланмаһа, 6 октябрҙә мәсьәләгә хоҡуҡ һаҡлаусылар ҡушыла.

«7 сентябрҙә мин беренсе этап тураһында доклад көтәм, һеҙ әйткәнсә. Ярай, икенсе этапты яҡшы уйлап сығарғанһығыҙ — әйҙәгеҙ, булһын. 5 октябрҙә бөтә нәмәнең тамамланыуы тураһында доклад көтәм. Әгәр 5 октябрҙә мин уны ишетмәһәм, 6 октябрҙә прокуратураға мөрәжәғәтемде әҙерләгеҙ. Унда прокуратура һәм тәфтиш комитеты килһен, кәрәк булһа. Был хәлдән арыным», - тип ҡушты республика башлығы.

Источник: ИА "Башинформ".