Радий Хәбиров Рөстәм Нәбиевҡа генерал Шайморатов миҙалын тапшырҙы

Саҡмағош районында тыуып үҫкән Рөстәм Нәбиев 2015 йылда армия хеҙмәтендә казарма емерелеү һөҙөмтәһендә ауыр йәрәхәттәр ала. Уның ике аяғын да ампутациялайҙар. Инвалид булыуына ҡарамаҫтан, егет әүҙем тормошҡа ҡайта һәм следж-хоккей, ә һуңыраҡ альпинизм менән шөғөлләнә. Быйыл Рөстәм Нәбиев тарихта Эвересты бер ҡул менән яулап алған беренсе кеше булды.

Спортсы әүҙем гражданлыҡ позицияһын биләй, Рәсәй Йәмәғәт палатаһы һәм Башҡортостан Башлығы ҡарамағындағы Кеше хоҡуҡтары һәм граждандар йәмғиәте институттарын үҫтереү буйынса Совет ағзаһы булып тора. Рөстәм Нәбиев даими рәүештә йәштәр сараларында ҡатнаша, үҫеп килгән быуынды дәртләндереп тора һәм үҙенең миҫалында тормошта мөмкин булмаған бер нәмә лә юҡлығын күрһәтә.

- Һеҙ беҙҙең ғорурлығыбыҙ, ысын яугир һәм бик яҡшы кеше, - тине Радий Хәбиров.

Рөстәм Нәбиев республиканың идара итеү командаһына юғары награда өсөн рәхмәт белдерҙе.

– Мин уны ҙур яуаплылыҡ тип ҡабул итәм, артабан да үҙ миҫалым менән кеше мөмкинлектәренең улар осраған шарттарға ҡарағанда күпкә киң булыуын күрһәтер өсөн, – тип һыҙыҡ өҫтөнә алды ул. - Республикабыҙҙы һәм илебеҙҙе данлау өсөн артабан да мөмкин булғандың барыһын да эшләйәсәкмен.

Источник: сайт главы РБ.