Башҡортостандың Ауырғазы районында юлдар ремонтлау дауам итә

- Республика һәм милли проекттар ярҙамында юлдарҙы планлы ремонтлауҙы дауам итәбеҙ, - тип хәбәр итте социаль селтәрҙә район хакимиәте башлығы Арыҫлан Шәһәретдинов.

- Йәй-юл эштәренең традицион осоро, һәм быйыл да ситтә ҡалманыҡ. Бөтә ҡатмарлыҡтарға ҡарамаҫтан, юлдарыбыҙҙы тәртипкә килтереүҙе дауам итәбеҙ, һәм был тәү сиратта республика яғынан системалы ярҙам һәм милли проекттарҙы тормошҡа ашырыу арҡаһында мөмкин булды. Был миҙгелдә Байкал ауылына инеү юлының 2 саҡрым оҙонлоғондағы участкаһын ремонтлау тамамланған, Шланлы ауылындағы Үҙәк урам участкаһына асфальт түшәлгән, Көйәҙебаш һәм Ташлыкүл ауылдарында юлдар ремонтланған, Талбазыла Урман урамындағы япма яңыртылған.

Эштәр дауам итә: Урал-Мораҙым юлы участкаһы (2 км) ремонтлана. 5,6 км оҙонлоҡтағы Талбазы ауылының Көнбайыш урау юлын төҙөү тулы көсөнә бара. Был юл бөтә районды үҫтереү өсөн стратегик әһәмиәткә эйә, ул үҙәкте бушатасаҡ һәм яңы мөмкинлектәр өсөн импульс бирәсәк.

Юлдарҙы тәртиптә тотоу - ғәйәт ҙур финанс сығымдарын талап итеүсе өлкә. Етди республика ярҙамы һәм федераль программаларһыҙ бындай күләмдәге бурыстарҙы үтәү бик ауыр булыр ине. «Тормош өсөн инфраструктура» милли проекты ярҙамында һәм «Башҡортостан Республикаһының транспорт системаһын үҫтереү» дәүләт программаһы сиктәрендә ошо маҡсатҡа өҫтәмә ресурстар бирелә.

Һәр ремонтланған километр - эҫелә һәм ямғырҙа, йыш ҡына ял көндәре булмаған юлсыларҙың ауыр хеҙмәте. 

Әлбиттә, проблемалы участкалар байтаҡ ҡала - бер миҙгел эсендә барыһын да үҙ эсенә алыу мөмкин түгел. Юлдарҙы ремонтлау- ул даими, системалы процесс.