Радий Хәбиров Өфө мэры вазифаһын башҡарыуҙы яңы кешегә йөкләтте

Өфөнөң яңы мэры итеп быға тиклем Хәйбулла районы хакимиәте менән етәкселек иткән Рөстәм Шәрипов тәғәйенләнде. Ул үҙ бурыстарын 1 июндә башланы, тип хәбәр итте Радий Хәбиров хөкүмәт кәңәшмәһендә.

«Һеҙ уны барығыҙ ҙа беләһегеҙ, таныштырып тороуҙың кәрәге юҡ. Ул 12 йыл хакимиәт башлығы булып эшләй. Биш йыл Бөрйән районы һәм ете йыл Хәйбулла районы менән етәкселек итә, өҫтәүенә уңышлы һәм әүҙем эшләй. Хәҙер Өфөгә бер аҙ энергия бирергә кәрәк, тип иҫәпләйем. Сөнки беҙ был энергияһыҙ һайлау кампанияһына инә алмайбыҙ, сөнки ул еңел булмаясаҡ, ҡала Советы һайланасаҡ. Ҙур хужалыҡ, уны ҡарарға кәрәк», - тип һыҙыҡ өҫтөнә алды Башҡортостан Башлығы.

Рөстәм Шәрипов 1982 йылдың 29 июлендә Бөрйән районының Яңы Мөсәт ауылында тыуған. БДУ-ның Сибай институтында һәм Башҡортостан дәүләт хеҙмәте һәм идара итеү академияһында белем ала. Профессиональ юлын 2000 йылда өсөнсө разрядлы рәссам булараҡ башлай. Һуңынан һатыу буйынса менеджер, кредит белгесе һәм банктарҙың клиент хеҙмәтләндереү бүлегендә эшләй.

2009 йылда – Бөрйән районы хакимиәтенең иҡтисад бүлегенең төп иҡтисадсыһы, ә бер йылдан һуң «Башинформ»мәғлүмәт агентлығының иҡтисад, коммерция һәм хужалыҡ департаментының иҡтисадсыһы. 2012 йылда Бөрйән районы хакимиәте башлығы итеп һайлана.

Сығанаҡ: https://www.bashinform.ru