Башҡортостан Рәсәй ҡатын-ҡыҙҙар союзының «Ай төбәге» проектын аса

Проекттың беренсе геройы Гүзәл Насирова етәкселегендәге ойошманың Башҡортостан Республикаһындағы бүлеге булды. Сығарылыштың төп темаһы булып уникаль проект — «Айыҡ ауыл» конкурсы торҙо.

Республикала 2017 йылда рәсми рәүештә старт алған программа тамырҙары менән Әбйәлил районы ҡатын-ҡыҙҙар советының 1996 йылғы башланғысына барып тоташа. Бөгөн был күләмле хәрәкәт 3000-дән ашыу тораҡ пунктты үҙ эсенә ала. Башҡортостан башлығы Радий Хәбиров һүҙҙәренсә, проект йәмғиәттең үҙен ойоштороуға йүнәлтелгән: кешеләр үҙҙәре «алкоголизация юҡ» тип әйтә, был инде суррогаттарҙан үлемдең ҡырҡа кәмеүенә килтерә.

"«Айыҡ ауыл» - ул спирт һатыуҙы сикләү генә түгел, ә ауылды тергеҙеүҙең комплекслы философияһы. Республиканың ҡатын-ҡыҙҙар советтары ауыл халҡының тормошона яңы мәғәнә бирә. Илкенәй һәм Шабағыш ауылдарында ғаилә династияларын һәм оҙон ғүмерлеләрҙе хөрмәтләү тергеҙелә, ә Кесе Бальзуга удмурт ауылында армияға оҙатыуҙан алып «Чожи сион» байрамына тиклемге боронғо йолалар хәҙер тик айыҡ форматта ғына үткәрелә. Проект төбәктең социаль именлеге ҡатын-ҡыҙҙар берләшмәләренең әүҙемлегенә һәм халыҡ традицияларын һаҡлауға туранан-тура бәйле булыуын иҫбатлай.

Фото: Рәсәй Ҡатын-ҡыҙҙар союзының төбәк бүлексәһе