Рәсәй боксёрҙары Баймаҡ районында оҫталыҡ дәресе үткәрҙе

Бындай саралар йәш спортсыларҙы дәртләндереп кенә ҡалмай, тренерҙарҙың профессиональ үҫешенә лә этәргес бирә.

Өфөлә уҙғарылған ҡатын-ҡыҙҙарҡыҙҙар боксы буйынса XXVI Рәсәй чемпионаты көндәрендә Баймаҡ районынан йәш спортсылар Рәсәйҙең атҡаҙанған спорт мастерҙары Юлия Немцова һәм Эдуард Әбйәлимов менән аралаша алды. Ҡунаҡтар үҙҙәренең тәжрибәһе менән уртаҡлашырға һәм балаларҙы бокс менән шөғөлләнергә рухландырырға килде. Баймаҡ районы башлығының кадрҙар һәм социаль сәйәсәт буйынса беренсе урынбаҫары Фәнил Нәҙерғолов, сараны асып, ҡунаҡтарға килеүҙәре өсөн рәхмәт белдерҙе:

- Районыбыҙҙы һайлағанығыҙ һәм балаларыбыҙҙы спорт менән шөғөлләнергә һәм юғары һөҙөмтәләргә өлгәшергә рухландырғанығыҙ өсөн рәхмәт!

Артабан балаларға ил, Европа һәм донъя чемпионаты финалисы Эдуард Әбйәлимов мөрәжәғәт итте:

- Бокс федерацияһы - бер ҙур ғаилә. Бөгөнгө күнекмәләрҙән һуң үҙегеҙҙе был ғаиләнең тулы хоҡуҡлы ағзалары тип һанарға мөмкин.

Оҫталыҡ дәресе мускулдарҙы һуҙыу һәм нығытыу буйынса күрһәтмә күнегеүҙәрҙән, шулай уҡ психологик әҙерлек тураһында һөйләүҙән башлана.

Эдуард Әбйәлимов бокс менән 26 йыл шөғөлләнеүе хаҡында һөйләне:

– Бокс-минең тормошом һәм дуҫтарым. Ул мине спорт менән генә түгел, ә ғәҙәти тормошта ла ауырлыҡтарҙы еңеп сығырға өйрәтте. Тәртип һәм характер тәрбиәләй. Баймаҡ егеттәренә үҙ-үҙҙәренә ышанырға, маҡсаттар ҡуйырға һәм уларға ирешеүҙәрен теләйем!

Юлия Немцова Башҡортостандың тәбиғәт матурлығына, халыҡтың ҡунаҡсыллығына һәм дөйөм алғанда республикала, шулай уҡ ҙур булмаған Баймаҡ ҡалаһында ҡатын-ҡыҙҙар боксының популярлығына һоҡланыуын белдерҙе. Сара балалар өсөн автограф-сессия менән тамамланды.

Автор:Равиля Бардыбаева

Читайте нас

Новости партнеров