Ауырғазы районында Батыр иҫтәлегенә мемориаль таҡтаташ асылды

«Украиналағы махсус хәрби операцияла батырҙарса һәләк булды» - Кәлсер мәктәбенең алғы яғында ҡуйылған мемориаль таҡтала ошондай һүҙҙәр яҙылған. Уны бөгөн, 18 сентябрҙә, ошо мәктәпте тамамлаған Руслан Абдрахманов иҫтәлегенә астылар.

Батыр иҫтәлегенә мемориаль таҡтаташ асылды

Тантанаға район хакимиәте башлығы Арслан Шәһәретдинов, мәғариф бүлеге начальнигы Рөстәм Ғиләжетдинов, Яңы Кәлсер ауыл хакимиәте башлығы Раил Диваев, район советы депутаты Лилиә Бүләкҡолова, эколог Миҙхәт Хәсәнов килде, геройҙың ата-әсәһе Эльза Рим ҡыҙы, Эдик Рафаэль улы, ҡатыны Айгөл Ғәлим ҡыҙы, бер туған ҡустылары, туғандары, ауылдаштары, мәктәп коллективы, уҡыусылар ҡатнашты.

Һәр сығыш яһаусы Русландың асыҡ, тырыш, изге күңелле кеше икәнлеген билдәләп үтте.

Арслан Нәзир улы үҙ сығышында батырҙарҙың иҫтәлеген һаҡлау уларҙың үлемһеҙлеген күрһәтә икәнлеген, ябай ауыл егеттәренең батырҙарса ил тыныслығын һаҡлауҙарын айырып әйтеп үтте.

Руслан Эдик улы үҙ теләге менән контракт төҙөп, Тыуған ил һағына баҫты һәм батырҙарса ғүмерен ҡорбан итте. Ошондай ҡыйыу яҡташтарыбыҙ өлгө булып торһон, уларға тиңләшегеҙ. Бөгөн һалдаттарыбыҙ Бөйөк Ватан һуғышында ата-бабалары йөрөгән һуҡмаҡтарҙан, юлдарҙан йөрөй, улар бер азат иткән ауыл-ҡалаларҙы дошмандан азат итә. Беҙ ышанабыҙ: Еңеү беҙҙең яҡта буласаҡ, сөнки беҙ дөрөҫлөк яҡлыбыҙ.

Руслан Абдрахманов 2006 йылда Кәлсербуран ауылында асылған ике ҡатлы яңы мәктәпкә беренсе класҡа уҡырға килде. Беҙ уның символик мәктәп асҡысын ҡулына ныҡ тотоп торғанын, Башҡортостандың президенты Мортаза Рәхимов менән бергә мәктәп ишеген асып ингәнен хәтерләйбеҙ. Руслан яҡшы уҡыны, төрлө сараларҙа әүҙем ҡатнашты, олоно – оло, кесене –кесе итә белде. Ауырғазы күп профилле колледжында һөнәр алып, крансы булып Өфөлә, һуңынан Норильскта эшләп йөрөнө. Өйләнде, ҡатыны Айгөл менән бәләкәй улдарын үҫтерәләр ине, йорт төҙөнөләр. Март айында үҙ теләге менән махсус хәрби операция зонаһына китте. Яуҙа күрһәткән батырлығы, ҡыйыулығы өсөн Руслан Эдик улына һәләк булғандан һуң Батырлыҡ ордены бирелде.

Бөгөн иһә ул белем алып сыҡҡан мәктәптә таҡтаташ асып, “Герой партаһы” булдырып, уның батырлығын мәңгеләштерҙеләр. Эколог Миҙхәт Рауил улы алып килгән 25 эрбет ағасы үҫентеһе мәктәп территорияһына ултыртылды.

Руслан тураһында яҡты иҫтәлек һәр саҡ хәтерҙә булыр, мәңге йөрәктәрҙә һаҡланыр.

Кәлсер мәктәбе директоры Эльвира Исламғолова

- Биографияһы ҡыҫҡа булды, ни бары 25 йыл. Әммә был ваҡыт эсендә Руслан күп нәмәгә өлгәшә – ғаилә ҡора, улына ғүмер бирә, йорт төҙөй. Ул-ата-әсәһенең, еренең лайыҡлы улы. Беҙҙең мәктәптә уҡығанда, ул, әлбиттә, беҙҙең йөрәктәрҙә мәңге ҡалыр тип уйламаған. Был иҫтәлекле билдә һәр ваҡыт тоғролоҡ, фиҙакәрлек, батырлыҡ тураһында иҫкә төшөрәсәк һәм ысын патриотизм өлгөһө буласаҡ.Беҙ Геройыбыҙҙың иҫтәлеген хөрмәтләргә тейешбеҙ. Еңеү беҙҙең ҡулда булыр, тип ышанабыҙ. Тыныслыҡ тиҙерәк килһен, яугирҙарыбыҙ иҫән-һау әйләнеп ҡайтһын

Республика башлығы Радий Хәбиров башланғысы менән ойошторолған «Атайсал» проекты халыҡ араһында киң танылыу тапты. Уның ярҙамында ауылдарҙа социаль әһәмиәтле объекттар ремонтлана, спорт майҙансыҡтары барлыҡҡа килә, мәсет, сиркәү һәм башҡа күп нәмәләр төҙөлә. Яҡташтар көсө идеяһы һәйкәлдәрҙе реконструкциялауға, ватанды һаҡлау буйынса изге бурысын лайыҡлы үтәгән замандаштарыбыҙҙың исемдәрен мәңгеләштереүгә ярҙам итә.