Ауырғазы районында «Атайсал» проекты буйынса ике һәйкәл асылды

Терәпә ауыл советы биләмәһендә йәшәүселәрҙең башланғысына урындағы эшҡыуар ярҙам итә

«Ватан көсө» өсөнсө республика форумы сиктәрендә Башҡортостан башлығы «Атайсал» проектында ҡатнашыусыларҙың барыһына ла битараф булмағандары һәм республика үҫешенә ҙур өлөш индергәндәре өсөн рәхмәт белдерҙе: - Бөгөн «Атайсал» проекты Башҡортостандан ситтә лә бара. Йолаларыбыҙға таянып, башҡаларға ярҙам итәбеҙ. Был бик мөһим. Һәм, әлбиттә, был проект йәмғиәтебеҙҙе берләштерә. Барығыҙға ла хеҙмәтегеҙ, бер-берегеҙгә ярҙам итергә ынтылыуығыҙ өсөн рәхмәт, - тине Радий Хәбиров.

30 августа Терәпә ауыл советында Бөйөк Ватан һуғышы яугир-яҡташтарға арналған ике мемориаль комплекс асылды. Төҙөкләндереүҙең бағыусыһы булып «Салауат крәҫтиән-фермер хужалығы»яуаплылығы сикләнгән йәмғиәте етәксеһе Василий Федоров тора. Был «Атайсал»проекты сиктәрендә тормошҡа ашырыла.

Веселовка һәм Терәпә ауылдарында һалдаттарҙың исемдәре яҙылған гранит плитәләр барлыҡҡа килде. Терәпә мәктәбе территорияһындағы композицияны шулай уҡ обелиск һәм һалдат скульптураһы биҙәй. Авторҙары - Өфөлә бик күп арт-объекттар төҙөгән Хәлит һәм Тимур Ғәлиуллиндар. Тыуған яҡты өйрәнеүсе Мөҙәрис Сафин яугирҙәр тураһында хәтерҙе һаҡлап ҡалырға ярҙам итә.

Асыу тантанаһына район хакимиәте вәкилдәре, депутаттар, урындағы халыҡ һәм ҡунаҡтар саҡырылды. Улар патриотизмдың һәм ветерандарҙың ҡаһарманлығына хөрмәт күрһәтеүҙең мөһимлеген һыҙыҡ өҫтөнә алды. Бөтәһе лә бындай башланғыстар яңы быуынды патриотик йүнәлештә тәрбиәләүгә булышлыҡ итә тип ризалаша.

Арслан Шәһәретдинов, Ауырғазы районы хакимиәте башлығы

- Беҙҙең районда ҙур йөрәкле кешеләр бар, улар тиҫтәләгән йылдар буйына үҙҙәренең бәләкәй ватанына ярҙам итә. Василий Федоров ауырғазыларға «Салауат»крәҫтиән-фермер хужалығы директоры, район Советы депутаты, «Башҡортостандың атҡаҙанған ауыл хужалығы хеҙмәткәре», «Салауат Юлаев ордены» кавалеры булараҡ ҡына түгел, ә бөтә район, яҡташтары өсөн мөһим проекттарға йомарт аҡса һалған кеше булараҡ та билдәле. Василий Иванович һәйкәл төҙөү инициаторы-спонсоры булып тора. Был һәм уның башҡа күп кенә изге эштәре «Атайсал»проектына индерелә. Республика башлығы Радий Фәрит улы Хәбиров башланғысы менән ойошторолған был проект тыуған ауылдарға һәм ҡалаларға ярҙам итергә әҙер булған кешеләрҙең көсөн берләштерә, — тип аңлатма бирҙе был ваҡиғаға район хакимиәте башлығы Арыҫлан Шәһәретдинов.

Сара аҙағында ҡатнашыусылар һәйкәлгә сәскәләр һалды һәм һәләк булғандарҙы бер минут тынлыҡ менән иҫкә алды. Яҡташтарыбыҙҙың героик үткәне тураһында иҫтәлек мәңге ҡаласаҡ!