ЮҒАРЫ НАГРАДАЛАРЫ МЕНӘН ҠОТЛАЙБЫҘ!

22 мартта, Мәҙәниәт хеҙмәткәрҙәре көнөндә Башҡорт дәүләт академия опера һәм балет театрында дәүләт наградаларын тапшырыу цермонияһы үтте.  Унда беҙҙең райондан да бүләкләнеүселәр булыуы һөйөнөслө.

"Башҡортостан Республикаһының атҡаҙанған мәҙәниәт хеҙмәткәре" почетлы званиеһына Мәҙәниәт бүлеге начальнигы Булат Фәйзрахман улы Баһауетдинов менән Бәхти Ғайсин исемендәге балалар музыка мәктәбе директоры Мират Зәкәриә улы Мусин лайыҡ булды. Уларға  Башҡортостан Республикаһы Мәҙәниәт министры Әминә Шафиҡова дәүләт наградаларын тапшырҙы.

“Бөгөнгө бүләкләү минең өсөн көтөлмәгән булды. Хакимиәт башлығы Шәһәретдинов Арслан Нәзир улына күрһәткән хөрмәте һәм ышанысы өсөн ҙур рәхмәтемде белдерәм. Һеҙҙең ярҙамығыҙ һәм иғтибарығыҙ мине бөтә башланғыстарымда камиллыҡҡа ынтылырға рухландыра.
Бындай һөҙөмтәләр мөмкин булған өсөн коллегаларыма рәхмәт һүҙҙәрен әйтергә теләйем. Әлбиттә, был награда минеке генә түгел, ә бөтә командамдыҡы. Улар кәңәшсе лә, ярҙамсы ла, мине баһалаусы ла. Ҡәҙерле коллегалар, юғары профессионаллегегеҙ, талантығыҙ һәм эшһөйәрлегегеҙ өсөн ҙур рәхмәт”, - тип шатлығы менән уртаҡлаша Булат Фәйзрахман улы социаль селтәрҙәрҙә.