2022 йылдың аҙағында «Рәсәй 1» телеканалы эфирында Рәсәйҙең иң һәләтле һәм үҙенсәлекле уҡытыусылары «Классная тема» шоуында ҡатнашасаҡ. Конкурс нигеҙендә һайлап алыу һөҙөмтәһендә ете педагог һайлап алынасаҡ, улар тура эфирҙа математика, химия, биология, география, тарих, физика, рус теле һәм әҙәбиәте буйынса дәрестәр үткәрәсәк. Популяр медиа шәхестәре уҡыусылар ролендә буласаҡ.

Башҡортостандан ике уҡытыусы - Октябрьский ҡалаһының 22-се мәктәбенән инглиз теле уҡытыусыһы Айгөл Хажиева һәм Мәләүез ҡалаһының 8-се мәктәбенән география уҡытыусыһы Наталья Кунакбаева - конкурс буйынса һайлап алыуҙа ҡатнаша. Улар ваҡытында заявка бирҙе, үҙҙәренең предметтары буйынса тест үтте, видеовизиткалар яҙҙырҙы.

- Йәмғиәттең прогрессив үҫешендә уҡытыусының роле бик ҙур, - тип билдәләй Айгөл Хажиева. - Ул йәштәрҙе тәрбиәләй, быуындарҙы фомалаштыра. Эйе, йәмғиәттең уҡытыусыға талаптары даими үҫә. Йәмғиәт үҫешенә лә уҡытыусының индергән өлөшө баһалап бөткөһөҙ. Тап шуға күрә лә уҡытыусының статусын күтәрергә, телевидениела һәм радиола мәғрифәтселек программаларын, журналдарҙа һәм гәзиттәрҙә мәҡәләләр баҫтырыуҙы арттырырға кәрәк, тип иҫәпләйем.

Наталья Ҡунаҡбаева уҡытыусыларҙың «Класс темаһы» шоуы кеүек форматтағы конкурстарында ҡатнашыуы педагог-новаторҙарға ла, йәмғиәткә лә мауыҡтырғыс һәм файҙалы тип иҫәпләй.

- Уҡытыусы һөнәрен һәр яҡлап популярлаштырырға, аң-белем таратыусы телетапшырыуҙар аша йәмғиәттә педагог статусын күтәрергә кәрәк, - тип инана уҡытыусы.

«Башҡортостан уҡытыусыһы» журналының баш мөхәррире Салауат Кәримов әйтеүенсә, уҡытыусының статусын күтәреү өсөн телевидениела һәм радиола аңлатыу тапшырыуҙарын тергеҙергә, уҡытыусыларға иң юғары кимәлдә әхлаҡи һәм матди ярҙам күрһәтергә кәрәк.

- Популярлыҡ уҡытыусының үҙенә, уның оҫталығына бәйле, - тип һыҙыҡ өҫтөнә ала Салауат Кәримов. - Педагогтың һөнәри сифаттарын баһалағанда төрлө алымдар, эшләнмәләр бик мөһим. Ә һөнәри конкурстар артабан үҫешеү өсөн теләк булдырырға, маҡсат ҡуйырға ярҙам итә. Беҙ уҡытыусыларыбыҙға һәр яҡлап ярҙам итәбеҙ, эш тәжрибәбеҙҙе лайыҡлы күрһәтеүҙәрен һәм һайлап алыу турын үтеүҙәрен теләйбеҙ. Киләһе йыл Уҡытыусы һәм остаз йылы тип иғлан ителгән, шулай булғас, «Класс темаһы» тигән яңы шоу матур эштәрҙең башы булһын.

(https://www.bashinform.ru мәғлүмәттәре буйынса әҙерләнде).