Бындай ҡарар ҡаты коммуналь ҡалдыҡтар менән эш итеүгә арналған фокус-төркөм форматындағы кәңәшмәлә ҡабул ителде. Уны республиканың Тәбиғәттән файҙаланыу һәм экология, Торлаҡ-коммуналь хужалыҡ министрлыҡтары ойошторҙо.
Кәңәшмәлә ҡатнашыусылар сүп-сар йыйыу һәм сығарыу өлкәһендәге проблемаларҙы ҡараны. Әйтәйек, Өфөлә йәшәүсе ҡатын социаль селтәрҙә Октябрь проспекты, 3/1 һәм 5/1 адресы буйынса пластик ҡалдыҡтар менән тулған контейнерға зарланған. Был берҙән-бер осраҡ түгел, бындай мөрәжәғәттәр менән халыҡ «Инцидент-менеджмент» системаһына йыш мөрәжәғәт итә, тип хәбәр итте Башҡортостан Башлығының Социаль коммуникациялар буйынса идаралығы начальнигы Елена Прочаковская. Сөнки республиканың барлыҡ муниципалитеттарында ла селтәрле контейнерҙар юҡ, улар «ТКО-Башҡортостан» системаһына индерелмәгән, ә ул сүп-сарҙы сығарыу графигы юҡ тигәнде аңлата. Һөҙөмтәлә республиканың Экология министрлығы ПЭТ-ҡалдыҡтар менән һөҙөмтәле эш итеү буйынса эште айырым контролгә алды.
Бынан тыш, төбәк операторҙарының махсус техникаһы сүп-сар контейнерҙарына яҡын урынлашҡан автомобилдәр арҡаһында ихаталарҙан сүп-сарҙы сығара алмай. Шулай уҡ юлдарҙа таҙартылмаған ҡар арҡаһында сүп-сар ташыусы машиналарҙың хәрәкәт итеү графигы ла боҙола.
«Ҡайҙалыр кадрҙар, ҡайҙалыр - урындағы власть иғтибары етмәй, ә ҡайҙалыр - ҡар таҙартыу техникаһы. Был мәсьәләләр бер көн, аҙна йәки ай эсендә хәл ителмәгәндәр иҫәбенән. Системалы мәсьәләләрҙе хәл итеү өсөн системалы ҡарарҙар кәрәк, шул иҫәптән аҡса ярҙамы менән дә», - тип билдәләнде кәңәшмәлә.
Тиҙҙән республиканың Экология министрлығы федераль финанслау ала - аҡса яңы контейнерҙар һатып алыуға йәки яңы контейнер майҙансыҡтары ҡуйыуға йүнәлтелә. Һәр контейнер майҙансығында милексе, төбәк операторы, сүп-сар сығарыу графигы хаҡында мәғлүмәт, шулай уҡ ошо майҙансыҡтарҙа ташларға ярамаған ҡалдыҡтар исемлеге барлыҡҡа килергә тейеш.
Яңы контейнер майҙансыҡтарының барыһын да цифрлаштырыу күҙаллана, улар тураһында мәғлүмәттәр «ТКО-Башҡортостан» мәғлүмәт системаһына индереләсәк.
Хәтерегеҙгә төшөрәбеҙ, «ТКО-Башҡортостан» - ЦУР-ҙа индерелгән һанлы сервистарҙың береһе. Ул төбәк операторҙарының ҡалдыҡтарҙы сығарыу буйынса хеҙмәттәрҙең сифатын һәм ваҡытында бирелеүен реаль ваҡыт режимында күҙәтергә мөмкинлек бирә. Бында республиканың һәр контейнер майҙансығын табырға һәм сүп-сарҙы сығарыу графигы боҙолғанмы-юҡмы икәнлеген тикшерергә мөмкин.
«Башинформ» мәғлүмәттәренән, фото шул уҡ сығанаҡтан.