Башҡортостанда балаларға аҡсалата түләү алыусылар исемлеге киңәйә

Башҡортостанда өс йәштән ете йәшкә тиклем балаларға аҡсалата түләү алыусыларҙың исемлеген киңәйтергә уйлайҙар. Был турала төбәк хөкүмәтенең оператив кәңәшмәһендә билдәле булған.

Ғаилә килеме йән башына йәшәү минимумынан – 9804 һумдан түбән булған осраҡта түләнә. Түләү күләме 4984 һум тәшкил итә. Республиканың Хеҙмәт һәм халыҡты социаль яҡлау министры Ленара Иванова хәбәр итеүенсә, республика ҡануниәте буйынса бындай түләүҙәр ата-әсәләр эшһеҙ булғанда түләнмәй.

Хеҙмәт баҙарындағы көсөргәнешле хәл менән бәйле, эшен юғалтҡан граждандарҙы түләү алыусылар исемлегенә индереү буйынса тәҡдим индерҙе. Ул, 88% түләүҙәр федераль бюджеттан финанслана, тип һыҙыҡ өҫтөнә алды.

Республиканың вице-премьеры Андрей Назаров был башланғысты хупланы һәм тейешле документтар әҙерләргә ҡушты.