УҠЫУСЫЛАРҘЫ БАШҠОРТОСТАН БУЙЛАП СӘЙӘХӘТТӘР КӨТӘ!

Стәрлетамаҡ районы уҡыусыларына «Мәктәп туризмы» программаһының беренсе ҡатнашыусылары булыу бәхете тейҙе. 45 уҡыусы өсөн Өфө буйлап сәйәхәт мауыҡтырғыс булды. Радий Хәбиров «Бәйләнештә» сәхифәһендә ошо программа тураһында яҙҙы.

Балалар өсөн махсус тарихи-патриотик маршрут төҙөлдө. Ул Өфө һәм Башҡортостан тарихына, билдәле кешеләр менән таныштырыуға арналды. Совет майҙанын һәм легендар генерал Миңлеғәле Шайморатов һәйкәлен күреүҙән башланды.

«Мәктәп туризмы» - федераль программа. Үткән йылда беҙҙең республика тәжрибә майҙансығы булды, яҡшы һөҙөмтәләр күрһәттек. 2023 йылда федераль бюджеттан күберәк аҡса бүленде - 188,7 миллион һум. Тағы ла 75,5 миллионы үҙебеҙҙең финанслау күләме.

Йыл аҙағына тиклем төбәк буйлап сәйәхәткә 5-9 кластарҙан 38 мең уҡыусы бара аласаҡ.

Республикабыҙ ҙур, ҡыҙыҡлы тарихи һәм архитектура һәйкәлдәре күп, таулы, яланлы, урманлы тәбиғәте бик матур. Бөтә ата-әсәләр балаларын алып йөрөтә алмай, мәҫәлән, Хәйбулла районынан Белоретҡа йәки Балаҡатайҙан Өфөгә.

«Мәктәп туризм»ы ошо мөмкинлекте бирә. Туҡланыу, йәшәү, экскурсия, оҫталыҡ дәрестәре – былар барыһы ла ата-әсәләр өсөн бушлай.

Балаларыбыҙға Башҡортостанды күреү, нығыраҡ белеү өсөн яҡшы проект.