Өфө вуз-ара кампусы резиденты тикшеренеүҙәргә 72 миллион һум аласаҡ

Конкурс «Етештереү һәм автоматлаштырыу сараларын етештереү өсөн фән һәм кадрҙар» федераль проекты сиктәрендә үткәрелә, ул «Етештереү һәм автоматлаштырыу саралары» милли технологик лидерлыҡ проектына инә. Һайлап алыуға бөтәһе 60 ғариза бирелгән, шуларҙың 22-һе генә ярҙам алған.

Университет проектын финанслау күләме 72 миллион һум тәшкил итәсәк. Аҡса өс йылға иҫәпләнгән: 2026 йылда университет 18 миллион һум аласаҡ, 2027 йылда - 24 миллион һум, 2028 йылда - 30 миллион һум.

- Беҙҙең кампус резиденты базаһында дәүләт ярҙамы менән заманса юғары технологиялы лаборатория булдырыу ғәмәли тикшеренеүҙәр өсөн яңы офоҡтар аса, улар республика сәнәғәтенең төп тармаҡтары үҫешенә туранан-тура йоғонто яһай. Тимәк, юғары уҡыу йорто студенттарының һәм йәш ғалимдарҙың индустрия талап иткән ҡыйыу фәнни эксперименттар һәм эшләнмәләр өсөн шарттар буласаҡ, — тип билдәләне Башҡортостандың Фән һәм юғары белем биреү буйынса дәүләт комитеты рәйесе Светлана Мостафина.

Яңы технологик лаборатория Өфө фән һәм технологиялар университетының Технологиялар һәм материалдар институтының машиналар эшләү технологияһы кафедраһы базаһында булдырыласаҡ. Университеттың йәш ғалимдары, аспиранттары һәм студенттары авиация материалдарын эшкәрткәндә ҡулланылған металл ҡырҡыу ҡоралының ныҡлығын арттырыу өлкәһендә тикшеренеүҙәр менән шөғөлләнәсәк.

Проект үҙәгендә - ҡаты иретмәле инструментҡа Ti-Al-Cr-Si-B-N системаһының нанокомпозит япмаларын һалыу технологияһын эшләү. Бындай япмалар уның ҡатылығын, туҙыуға һәм эҫегә сыҙамлылығын арттырырға, шулай уҡ эшкәртелгән материал менән тоташыуҙы кәметергә тейеш.

Проект етәксеһе, техник фәндәр кандидаты, доцент Алмаз Назаров аңлатыуынса, заманса авиадвигателдәр эшләү ҡатмарлы иретмәләрҙе юғары етештереүсәнле эшкәртеүҙе талап итә. Бындай эш ваҡытында ҡаты иретмәле инструмент тиҙ туҙа, һәм иң һөҙөмтәле ҡарарҙарҙың береһе булып махсус туҙыуға сыҙамлы япмалар һалыу тора.

- Иң технологик ысул - вакуум-дуға ултырмаһы. Ул тығыҙ структура һәм япманың яҡшы йәбешеүен тәьмин итә. Әммә был ысул менән Тi-Al-Cr-Si-B-N системаһында структураның формалашыу законлыҡтары әлегә етерлек өйрәнелмәгән. Шулай уҡ легирлаусы элементтарҙың ҡаты иретмә япмаларының үҙенсәлектәренә йоғонтоһо тураһында системалы мәғлүмәттәр юҡ, — тип һөйләне Алмаз Назаров.

Проекттың актуаллеге импортты алмаштырыу бурыстары, авиация сәнәғәте өсөн ватан технологияларын үҫтереү һәм эшкәртеүе ауыр булған авиация иретмәләрен эшкәртеү кәрәклеге менән бәйле. Яңы япмалар инструменттың хеҙмәт итеү ваҡытын оҙайтырға, эшкәртеү етештереүсәнлеген арттырырға һәм етештереү сығымдарын кәметергә мөмкинлек бирер тип көтөлә.

Белешмә.

Рәсәй Президенты Владимир Путин ҡушыуы буйынса илдә заманса кампустар селтәре булдырыла. 2030 йылға 25 кампус барлыҡҡа килергә тейеш. Эште Рәсәй Федерацияһы Хөкүмәте һәм Рәсәй Мәғариф һәм фән министрлығы алып бара. Хәҙер «Йәштәр һәм балалар» милли проекты ярҙамында 24 кампус проектлана һәм төҙөлә. 2036 йылға кампустар һаны 40-ҡа тиклем артасаҡ.

Өфөләге юғары уҡыу йорттары ара кампусы - был 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялар, эшлекле зоналар, магазиндар, скверҙар һәм башҡа уңайлы ҡала мөхите объекттары булған студенттар киңлеге.

Фото һәм сығанаҡ: campusufa.ru

#молодежьидети

#нацпроектмолодежьидети