Өфө студенттар кампусы фиджитал-спортты үҫтереүгә грант алды

- Заманса цифрлы технологияларҙың йылдам үҫеше шарттарында йәштәрҙең үҙ оҫталыҡтарын традицион спорт дисциплиналарында ла, яңы электрон форматтарҙа ла универсаль үҫтерә алған платформалары булыуы мөһим. Был бер үк ваҡытта әүҙем йәшәү рәүешен популярлаштырыу һәм һанлы донъяның заманса компетенцияларын формалаштырыу, – тип иҫәпләй Башҡортостандың йәштәр сәйәсәте министры Вито Сабиров.

«Арыҫлан» студенттар спорт клубы һәм проект эшмәкәрлеге идаралығы физик спортты һәм цифрлы технологияларҙы берләштергән «Өфө студенттар фиджитал лигаһы» оҙайлы сроклы проектын тормошҡа ашыра. Уның маҡсаты - төрлө әҙерлек кимәлендәге студенттар үҙҙәрен традицион һәм цифрлы дисциплиналарҙа ла күрһәтә алырлыҡ уңайлы һәм заманса спорт мөхите булдырыу.

- Беҙҙең «Арыҫлан»дың ҡаҙаныштары күп, 2025 йылда спорт клубы өсөнсө тапҡыр рәттән Башҡортостан Республикаһының иң яҡшы студенттар спорт клубы булды һәм «Йыл студенты-2025» Рәсәй милли премияһы версияһы буйынса Рәсәйҙең иң яҡшы 5 студенттар спорт клубы исемлегенә инде. Проект фиджитал-спортты яңы белем биреү һәм тәрбиә йүнәлеше булараҡ үҫтереүгә йүнәлтелгән. Бындай форматтарҙы университет мөхитенә интеграциялау заманса педагогик һәм спорт тәжрибәләрен индереү буйынса инновацион майҙансыҡ булараҡ Аҡмулла университетының статусын нығытасаҡ, - тип билдәләне Аҡмулла университеты ректоры Салауат Сәғитов.

- Проектта ҡатнашыуға Өфө ҡалаһының биш юғары уҡыу йорто студенттары йәлеп ителәсәк. Улар өсөн фиджитал-сараларға әҙерләнеүгә һәм уны үткәреүгә арналған белем биреү-ағартыу программаһы ойоштороласаҡ. Проект сиктәрендә университет командалары өсөн квалификация этаптары, шулай уҡ асыҡ майҙансыҡтар, оҫталыҡ дәрестәре, йәмәғәт эшмәкәрлеге һәм лиганың финал матчтары менән фиджитал-фестиваль планлаштырылған. Проект сараларында 3000 - дән ашыу студенттың ҡатнашыуы көтөлә, - тип һөйләне «Арыҫлан»дың спорт һәм физкультура-күмәк эш секторы етәксеһе Азамат Төхвәтуллин.

Конкурс йомғаҡтары буйынса Рәсәйҙең 34 төбәгенән бөтәһе 52 проект еңеүсе булды. Башҡортостан Республикаһынан конкурсҡа 32 ғариза бирелгән.

Белешмә.

Рәсәй Президенты Владимир Путин ҡушыуы буйынса илдә заманса кампустар селтәре булдырыла. 2030 йылға 25 кампус барлыҡҡа килергә тейеш. Эште Рәсәй Федерацияһы Хөкүмәте һәм Рәсәй Мәғариф һәм фән министрлығы алып бара. Хәҙер «Йәштәр һәм балалар» милли проекты ярҙамында 24 кампус проектлана һәм төҙөлә. 2036 йылға кампустар һаны 40-ҡа тиклем артасаҡ.

Өфөләге юғары уҡыу йорттары ара кампусы - был 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялар, эшлекле зоналар, магазиндар, скверҙар һәм башҡа уңайлы ҡала мөхите объекттары булған студенттар киңлеге.

Фото һәм сығанаҡ: campusufa.ru