Ҡәҙерле атаһы юлын дауам итә

Шахмат – бик үҙенсәлекле спорт төрө. Бында, нигеҙҙә, һан менән түгел, ә аҡыл, уйлау менән еңеү яуларға мөмкин. Бөгөнгө геройым Линат Шәйәхмәтов – бик үҙенсәлекле, яҙмыш һынауҙарын еңә алған спортсы.  Ул 2007-2008 йылдарҙан алып төрлө ярыштар үҙен әүҙем һынап ҡарай.

Шуныһы үҙенсәлекле: Шәйәхмәтовтар башлығы Илдар үҙе Рәсәй кимәлендә ошо спорт төрө буйынса бихисап ярыштарҙа ҡатнашҡан.

Былтыр Өфөнән Линат Шәйәхмәтов Алгуштала һаңғырауҙар араһында шахмат буйынса үткәрелгән ярыштарҙа блиц буйынса Рәсәй чемпионы тип танылғайны. Ул “блиц” дисциплинаһында 11 тур һөҙөмтәләре буйынса беренсе урын яуланы һәм Башҡортостан Республикаһы өсөн лайыҡлы сығыш яһаны. Линат  2017 йылда ла ошо уҡ дисциплинала Рәсәй чемпионы булып танылғайны. 2018 йылда “Рәсәйҙең һаңғырауҙар (шахмат) спорты буйынса атҡаҙанған мастеры” исеменә лайыҡ булды.  

“Беҙ бергә. Спорт” Бөтә Рәсәй ҡышҡы спартакиадала 33 йәшлек Линат 66 йәшлек атаһы Илдар Шәйәхмәтов менән сығыш яһай. Бәләкәй саҡтан – балалар баҡсаһында шахмат һындары төшөрөлгән китапты табып алғандан һуң – башланған был мауығыу егеттең ғүмерлек шөғөлөнә әүерелгән. Шул ваҡыттан атай кеше улына беренсе тренер булған. Хәҙер Линат - өс тапҡыр Рәсәй чемпионы. Әлеге спартакиада ла яҡташыбыҙға уңыштар килтерер, тип уйлайбыҙ. Атай менән улдың бала саҡтан спорт тигән мауыҡтырғыс тармаҡта бер-береһенә терәк булып алға ынтылыуы – һоҡланғыс күренеш.