Ауырғазы районы үҙәгендә Физкультура-һауыҡтырыу комплексы төҙөлөшө башланды

Уны төҙөүгә республика бюджетынан яҡынса 545 миллион һум йүнәлтеләсәк. Спорт комплексын төҙөү һәм төҙөкләндереү буйынса эштәрҙе 2026 йылдың июленә тиклем тамамлау планлаштырыла.

Өфөнөң «Билд» компанияһы 544,9 миллион һумға контракт төҙөнө, - тип хәбәр ителә дәүләт һатып алыуҙары сайтында.

Комплекс Парк урамында, район газ хужалығы хеҙмәте бинаһы артында,  урынлашасаҡ. Бөгөн бында техникалар эшләй, бина өсөн майҙан әҙерләнә. Был йәһәттән Башҡортостан Башлығы Радий Хәбировтың да ҡаҙанышы бар. Башта төҙөлөштө 2025 йылда башлау планлаштырылғайны. Радий Хәбиров ярҙамы менән аҡсаның бер өлөшөн 2025 йылдан 2024 йылға күсерергә мөмкин булды. Быйыл ошо маҡсатҡа 25 миллион һум йүнәлтелде. Тимәк, алдан уҡ эшләй башлау мөмкинлеге барлыҡҡа килде.

ФОК ниндәй буласаҡ?  

Ул бассейны булған ике ҡатлы бинанан ғибәрәт буласаҡ.

Спорт комплексының үткәреү һәләте тәүлегенә 80 кеше тәшкил итәсәк, шул иҫәптән бассейнға — 32 кеше. Бер үк ваҡытта бында 106 кеше шөғөлләнә аласаҡ.

Бассейнда балаларҙы уҡытырға һәм күнекмәләр менән ярыштар үткәрергә, шулай уҡ реабилитация үтергә мөмкин буласаҡ. Бассейндың тәрәнлеге 1,2 метрҙан 1,8 метрға тиклем буласаҡ.

Һис шикһеҙ, был комплекс йәштәр араһында ла, өлкән быуын араһында ла ҙур һорау менән файҙалана башлаясаҡ. Ауырғазыларҙың йәшәү сифатын һәм ауыл тормошоноң йәлеп итеүсәнлеген арттырасаҡ.