Ерҙе аҡ ҡар һылап киткән

Ерҙе аҡ ҡар һылап киткән,

Һырыған юрғанмы ни.

Яҙыласаҡ китап битен

Ел асып торғанмы ни!

Баҫҡан һайын «шығыр!..» бында

Һәр аҙымың «шиғыр...» бында.

Шығыр-шығыр... Бик шәп сығыр,

Тик яҙ шиғыр! Шығыр-шығыр...

Офоҡтан офоҡҡа ҡарап

Йырғанда ҡар диңгеҙен,

Китаптың тәү юлы булып

Ярылып ҡалды эҙем.

Ә ҡар һаман йырлай бирә,

Йөрәгемә ҡеүәт бирә:

Шығыр-шығыр... Бик шәп сығыр,

Тик яҙ шиғыр! Шығыр-шығыр...

12.01.1963