КӨҘ

Моңһоуланып ҡалды донъя,

Ҡараңғыланды офоҡ,

Күк йөҙөндә һыр-болоттар,

Ҡояш та ҡарай тоноҡ.

Һалҡын ел ағас япрағын

Йолҡоп алып тарата,

Дымға сарсаған тупраҡты

Көҙгө ямғыр сылата...

Шиңгән хәҙер гөл-сәскәләр,

Һарғайған үләндәре,

Һайыҡҡан йылға-күлдәрҙең

Тартылған үҙәндәре...

...Көҙ – эҫе йәй булмаҫ инде,

Һәр миҙгелдең үҙ йәме.

Алтын көҙҙө нимә биҙәй?

Байлыҡ һәм муллыҡ тәме.