1 СЕНТЯБРЬ – БЕЛЕМ КӨНӨ

1 СЕНТЯБРЬ – БЕЛЕМ КӨНӨ

(Минира Бикәнәсова)

Уҙып китте каникулдар,

Үтте инде йәйҙәрем.

-Уҡырға кил, - тип саҡыра

Мине туған мәктәбем!

Класс бүлмәһе, спорт залы

Беҙҙе күптән көткәндәр.

Хатта китап, дәреслектәр

Һағынышып бөткәндәр.

Уҡытыусым ҡаршы ала

Йылмайып-көлөп кенә.

Күрерһегеҙ: өлгәшермен

“Дүртле”-“бишле”гә генә.

Мәктәп баҡсаһында уңған

Йәшелсәләр-емештәр.

Ялҡауланырға урын юҡ –

Көтәләр көҙгә эштәр!

Белем алып, хыялдарҙы

Ысын итербеҙ әле!

Килеп етер, оҙаҡламаҫ

Һөнәрҙәр һайлау мөле.

Үҙ телемдә, үҙ еремдә

Белем алыуы рәхәт!

Мәктәп юлы аша үтә

Фән иленә сәйәхәт!