Һабантуйҙар мәле етте бына
Башҡортомдоң данлы йолаһы!
Халыҡ гөжләй күс айырған ҡорттай,
Әллә ҡайҙан күр(е)нә ҡолғаһы...
Теҙелгәндәр башҡорт тирмәләре,
Моң түгелә гармун, ҡурайҙан,
Уйын-көлкө, бәйге, ярыш ҡыҙа,
Майҙан тота аттар туғайҙа...
Келәмдәрҙә бил һынаша ирҙәр,
Батырҙарға әҙер ҡуй-тәкә!
Көршәктәге ҡатыҡ араһынан
Берәү эҙләй көмөш бер тәңкә...
Ҡул көрәше бара был урында...
Көйәнтәләп һыу ташый ҡыҙҙар...
Осрашалар-күрешәләр дуҫтар –
Һәр кемдә лә изге ниәт-уйҙар...
Ялан аяҡ берәү эй, үрмәләй
Бейек икән ҡолға түбәһе!
Бүләктәре менән ымһындыра
Түрҙә торған оҙон һөбәһе...
Һатыу-кәсеп ҡыҙған киң майҙанда
Йәнең теләгәне бар бында.
Ҡоймаҡ, ҡыҫтыбыйын бешерәләр,
Самауырҙар йырлай табында...
Ялан батырҙарын хөрмәтләйҙәр,
Йыр-моңдар ҙа улар хаҡына!
Баҫыуҙарҙа сәсеүҙе тамамлап,
Байрам бүләк итте халҡына.
...Мул уңыштар бирһен баҫыу-ҡырҙар
Ҡеүәт алып ерем ҡуй(ы)нынан.
Изге ямғыр теләп бер Хоҙайҙан
Ҡайтып киләм һабантуйынан...