Мөхәббәттә, барса йәме, ахыры, тормоштоң!

Ул 1959 йылдың 1 майында Төрөмбәт ауылында тыуған. Йәш шағир хаҡында 1976 йылда Ким Әхмәтйәнов «Совет Башҡортостаны» гәзитендә күләмле мәҡәлә баҫтыра. Уның «Ҡоштар юлға сыға» исемле китабы 1982 йылда , ә 1995 йылда, арабыҙҙан иртә киткән Зарема Әхмәтйәнова, Ринат Хәйри, Рәмзил Вәлиевтарҙың ижады тупланған «Әйтелмәгән васыят» исемле китабы донъя күрә.

Күңел төбөндә ятҡан уй-хыялдарын, йөрәгенән сығыр моңдарын үҙе менән алып китте шағир. Шағир Риф Мифтахов әйтеүенсә, Рәмзилдең архивында 180 дән ашыу ҡабатланмаҫ яҙмалары һаҡлана.

Шиғырҙарының бер нисәһен иғтибарығыҙға тәҡдим итәбеҙ.

Ҡурай моңо

Сал Уралдың ғорур ҡаялары

Быуаттарҙың серен һөйләйме?

Ағиҙелдең иркен үҙәндәре

Илһамлы бер моңдо көйләйме?

Бәлки, яҡты йондоҙ нурҙарына

Аҡҡош ҡанаттары ҡағылып,

Сафлыҡ бөркөп, алтын шишмә кеүек,

Сыҡҡандыр был ауаз ағылып?

Ҡурай уйнай егет,

Бар тәбиғәт

иҙрәгәндәй уның моңонан.

Сихри тылсымынан ошо моңдоң

Таштар уянғандар йоҡонан!

Ағыла йыр,

Зарлы быуаттарҙың

Бөгөнгөгә еткән тауышы.

Башҡорт күңеленең хис ташҡыны,

Мөхәббәте, дәрте, һағышы.

Һин дә ашыҡ, дуҫым

Ҡабаланып ҡояш нурын һибә,

Ашығалар ҡоштар ояға,

Яҙҙар шулай гел ашығып килә,

Ашҡыныуҙар бөркөп донъяға.

Йөрәк тә бит, яҙғы айҙар етһә,

Һәммәһенә була ҡабалан.

Шатлығы ла бер үк, хәсрәте лә

Артып киткән була саманан.

Һин дә ашыҡ, дуҫым,

Был арала

Һирәгәйҙе сәләм хаттарың.

Юйып ташлар хатың,

Һағынғанда

Күңелемдең һағыш таштарын.

***

Шатлыҡ, хәсрәт, яҡшы, яманы

Төйнәләләр ғүмер ебенә;

Тормош бүләк иткән тәьҫорат

Хәтерҙәрҙә һүнмәй тиҙ генә.

Һәммәһе лә ҡала күңелдә,

Эҙһеҙ шиңеп бөтә күбектәр.

Йылдар иләгенән иләнеп,

Йәшәй бары ынйы бөртөктәр.

***

Иң бәхетле көнөм шул көн ине,

Иң бәхетле иртәм - шул иртә.

Яҙғы наҙҙай йөрәккә дәрт биргән

Тәүге мөхәббәткә ни етә?

Хәтеремдә яҙҙан ялҡынлыраҡ

Хәтирәһе ап-аҡ шул ҡыштың.

Мөхәббәттә, тәүге мөхәббәттә

Барса йәме, ахыры, тормоштоң!