Бөтә яңылыҡтар
Илһам
22 Март 2019, 02:00

Шиғыр яҙҙым ултырып

Беҙ барыбыҙ ҙа матурлыҡҡа һоҡланабыҙ, тәүге һөйөү хистәре кисерәбеҙ. Ижад емештәре лә илаһи кисерештәрҙән донъяға тыуа. Шиғриәт - кеше күңелендәге иң изге тойғоларҙы асып бирә, донъяға ҡарашыбыҙҙы, уны нисек ҡабул итеүебеҙҙе күрһәтә торған ғәжәйеп донъя. Бөгөнгө шиғырҙарҙың авторҙары - яҡташтарыбыҙ, береһе - Мораҙым ауылында тыуып үҫеп, әлеге көндә Өфөлә йәшәүсе Луиза Кирәева, икенсеһе - Усман ауылынан Минира Бикәнәсова, улар ижад емештәре аша эске кисерештәрен, уй-фекерҙәрен һеҙгә еткерер.

Күңел


Болоттарҙы ҡыуып зәңгәрлектә,

Елдәрҙән дә етеҙ остоңмо?

Ер һәм күкте тоташтырып бергә,

Бейеклектә ирек ҡостоңмо?

Дауыл һине ергә бәргәндә лә

Таяндыңмы ҡанат көсөнә?

Үлән аша яҡты нурҙы күреп,

Һоҡландыңмы күктең төҫөнә?

Ҡаурый һайын осто күпме хыял,

Күпме аҡыл, теләк-хистәрең...

Әл дә таңдар оноттора икән

Һалҡынлығын ҡара кистәрҙең...

Ямғыр үтеп, ҡояш сыҡты, ана,

Йәйғор балҡый тормош күгендә!

Күңел ҡошом, һин тағы ла бына

Талпынаһың яҙмыш түрендә.

Бирешмәсе, тормош күгендә?!


Бәпкә


Ата ҡаҙы килеп суҡый тәүҙә,

Инә ҡаҙ ҙа шунан һелкетә.

Туғандары килеп йолҡҡанда

Нисек сыҙай икән был бәпкә?


Өйрәтәме улар тик үҙенсә,

Бындай булма, һин, тип, йән-көйөк.

Тәбиғәтте аңлап бөтөп булмай,

Ҡайҙан килә меҫкен сибеклек?


Тормош уҡтарына ышаныс юҡ –

Көсһөҙҙәрҙе ала тиҙ сәпкә.

Ә шулай ҙа үҫер әле, үҫер –

Үҙен-үҙе еңһә был бәпкә!

Луиза Кирәева



Бөгөнгө көн уңайынан


Яҙҙы яҡынайтыр тылсым

Табайымсы,

Ер усына тамсы булып

Тамайымсы.

Йән йылымдан бөрөләрҙе

Уятырмын,

Күңелемде гөлдәр менән

Уратырмын.

Йәй иңенә баҫып ҡына

Һайрар инем,

Йырлы-моңло ғына сағым

Әле минең.

Емештәрем уңып бешер

Көҙөм көтөр,

Хоҙайымды юлдаш итһәм-

Көсөм етер!


Ғүмер


Кеше ғүмере алтынға тиң

Хоҙай биргән ҙур бүләк!

Тик әжерен бер нисек тә

Ҡайтарып булмай түләп.


Кеше ғүмере үтә ҡыҫҡа

Сәскә атҡан гөл һымаҡ,

Йә булмаһа, усаҡтағы

Янып-һүнәр бер сыраҡ.


Кеше ғүмере-үҙе тарих

Асып-ябылған китап,

Ғәмәл дәфтәреңде барлап

Килер ҙә етер Хисап...

Минира БИКӘНӘСОВА.


Читайте нас в