Ватанды һаҡлаусылар көнө менән ҡотланылар

Уҡыусылар ҡунаҡтар алдында патриотик йырҙар башҡарҙы, шиғырҙар һөйләне. Махсус хәрби операция зонаһынан ҡайтҡан Рәзил Ҡаһировтың һәм Чечен һуғышын үткән Фларис Юнысовтың нисек хеҙмәт итеүе, ниндәй ауырлыҡтар үткәреүе, быларҙан ниндәй тормош һабағы алыуы тураһында һөйләүҙәрен ҙур ҡыҙыҡһыныу менән тыңланылар. Ҡунаҡтар шулай уҡ үҙҙәренең иптәштәре, ауыр мәлдәрҙә бер-береңә ярҙам итеүҙең ни тиклем мөһим булыуы тураһында әйтеп үтте. Бындай шарттарҙа тыуған дуҫлыҡ ныҡлы ла, ышаныслы ла.

Рәзил әрмелә хеҙмәт итмәгән, шулай ҙа был уның теләгенә кәртә булмай. «Космос» позывнойлы яугир ике йыл эсендә тормошто, ғаилә һәм дуҫлыҡ ҡәҙеренең ҡиммәтен нығыраҡ аңлауын белдерҙе.

• Контракт төҙөгәнгә тиклем Уренгойҙа эшләнем. Егеттәр махсус хәрби операция зонаһына китә башлағас, мин дә ныҡлы ҡарар ҡабул иттем. Эштән ҡайттым да, бөтә кәрәкле документтарҙы йыйҙым, шунан һуң ғына ғаиләгә был турала әйттем. Мине атайымдың реакцияһы ғәжәпләндерҙе. Ул асыуланыр, тип уйлағайным. Киреһенсә, мине хупланы. Үҙем дә бик барыр инем, тик йәшем генә күберәк, тине. Уға бит инде етмеш етә. Атайымдың нәсихәттәре мине рухландырып ебәрҙе. Өфөлә бер ай күнекмәләр үткәс, 2022 йылдың декабрендә тейешле урынға юлға сыҡтыҡ. Шарттарға тиҙ эйәләштем. Унда бөтә нәмәгә тиерлек икенсе төрлө ҡарай башлайһың, дуҫлыҡ та бүтән төрлө, ышаныслы беҙ бер туғандар кеүек булып бөттөк. Тылдан ярҙам йыш килеп тора. Бигерәк тә уҡыусыларҙың хаттары, үҙ ҡулдары менән эшләгән бүләктәре ниндәйҙер айырым йылылыҡ бирә ине. Уларҙы үҙебеҙҙең түш кеҫәлә лә йөрөттөк.

Рәзил Ҡаһиров артиллерист та, өлкән пулеметсы ла була. Яҡындарының рухи ярҙамы, өйҙә ҡыҙҙары һәм улының көтөүе ауырлыҡтарҙы еңергә ярҙам итә. Әле улар дүртенсе сабыйҙарын көтә, шуға ла ғаилә башлығы бөтөнләйгә ҡайтҡан. «Чечен» Фларис Юнысов әрме хеҙмәтенең ир-егеткә күп нәмә биреүен – сыныҡтырыуын, характер тәрбиәләүен - билдәләп үтте. Ә уҡыусылар төрлө һорауҙар бирҙе, яһаған бүләктәрен тапшырҙы.