Ауырғазы районынан Ишморатовтар ғаиләһе бриллиант туйҙарын билдәләне

Был көндө ҡунаҡсыл хужалар иң яҡындарын һәм туғандарын ҡабул итте. Ҡыҙҙарыы Гүзәл һәм кейәүҙәре Илшат, ике яҡтан бер туғандар юбилярҙарҙы ихлас ҡотланы, иң яҡшы теләктәрен теләне. Талбазы ауыл советы хакимиәте башлығы Илгиз Тимербулатов Башҡортостан Башлығы Радий Хәбировтың сәләмләү хатын һәм иҫтәлекле бүләк тапшырҙы.

Ишморатовтар ҡырҡ йылдан ашыу инде Талбазыла йәшәй, беҙҙең район улар өсөн икенсе бәләкәй тыуған төйәктәренә әйләнгән.

Миңлерәис Миңлеғәли улы Стәрлетамаҡ районының Талас ауылында тыуған. Уларҙың ғаиләһе ҙур һәм татыу була. Миңлеғәле Һәм Ғәйниә Ишморатовтар ете ул һәм өс ҡыҙ тәрбиәләгән. Миңлерәис дүртенсе булып тыуа, уға бер йәш тә булмағанда, Бөйөк Ватан һуғышы башлана, атай кеше фронтҡа китә. Өс һеңлеһе һәм өс ҡустыһы һуғыштан һуң донъяға килә. Ата-әсәһе эшһөйәр, яуаплы була, был сифаттарҙы балаларға ла һеңдерә. Атаһы, Курск дуғаһындағы алыштарҙа ҡатнашыусы, колхоз рәйесе була. Әсәһе колхоз ашханаһы өсөн икмәк бешерә.

Бала саҡтан Миңлерәис хайуандарҙы ярата, улар менән мәш килә. Бәлки, был һөнәр һайлауға йоғонто яһағандыр. Ул зоотехник һәм ветеринар табип һөнәрен ала. Хеҙмәт юлы тыуған районында башлана. Уны Талалаевка ветеринария участкаһы мөдире итеп тәғәйенләйҙәр. Артабан - сик буйы ғәскәрҙәрендә хеҙмәт йылдары.

Ленин исемендәге колхозда зоотехник булып эшләгән йылдарында йәш егет үҙенең яҙмышын осрата. Бер туған ғаһы Әнүәр директор булған мәктәпкә Бәләбәй педагогия училищеһынан башланғыс кластар уҡытыусыһы килде. Миңлерәискә мотоциклда ағаһы янына килә һәм унда ҡара сәсле, матур ҡыҙҙы күрә. Уның исеме Вәзимә була. Күп тә үтмәй, егет ҡыҙҙы киноға саҡыра. Вәзимә, Миңлерәис кеүек үк, йәмәғәт эштәрендә әүҙем ҡатнаша, шуға ла уны мәктәптең комсомол ойошмаһы секретары итеп һайлайҙар. Уларҙың юлдары йыш ҡына комсомол эштәре буйынса киҫешә. Бер аҙҙан ғашиҡтар өйләнешә, ауыл йолалары буйынса туй үткәрә. Кейәү кәләшен тыуған ауылы Таласҡа бер төҫтәге аттарҙа алып ҡайта.

Вәзимә лә күп балалы ғаиләлә үҫә. Атаһы Бөйөк Ватан һуғышында ҡатнашыусы, колхоз производствоһы ветераны, ә әсәһе Суфия оҙаҡ йылдар колхозда йәшелсәсе булып эшләй. Бәләбәй районының Мәтәүбаш ауылы - ир менән ҡатын өсөн йөрәктәренә ҡәҙерле бер урын. Унда Вәзимә Кәлимулла ҡыҙының туғандары менән шатланып йыйылышалар.

Ишморатовтар ғаилә башлығын төрлө вазифаларға тәғәйенләүҙәре арҡаһында йыш күсенеп йөрөйҙәр. Үҙҙәре әйтеүенсә, ете йортта ете ремонт үткәрелгән. Ҡыҙы Гүзәл Ҡырмыҫҡалыла, ә улдары Айрат Наумда тыуа. Стәрлетамаҡта Йәшәгәндә, Миңлерәис ғаиләһе менән ваҡыт үткәрергә лә өлгөрә: баҡсаға йөрөй, саңғыла йөрөргә, балыҡ тоторға сыға.

Һәм бына - Ауырғазы районына тәғәйенләнеү, район комитетының беренсе секретары вазифаһы. Ҡыҙы урта мәктәпте Талбазыла тамамлай. Уның табип булырға ҡарары ныҡлы була,табип-педиатр дипломын ала һәм бөгөн Гүзәл Миңлерәис ҡыҙы – Башҡорт дәүләт медицина университеты кафедраһы профессоры. Ире менән бергә улы Айҙарҙы тәрбиәләйҙәр, ул, олатаһы кеүек үк, ғилми-тикшеренеү эштәре менән шөғөлләнә, техник фәндәр кандидаты.

Ишморатовтарҙың Улы Айрат - иҡтисад фәндәре кандидаты, хәҙер ул уңышлы эшҡыуар. Ҡатыны Рената менән ике ул һәм ике ҡыҙ тәрбиәләйҙәр. Балалар ата-әсәләренә рәхмәтле.

- Атайыбыҙ менән әсәйебеҙ һәр ваҡыт эш менән мәшғүл булды. Шул уҡ ваҡытта ғаилә йолалары тураһында ла онотманылар: тәбиғәткә сығыу, туғандарыбыҙға барыу, күңелле осрашыуҙар,- тип һөйләй ҡыҙҙары Гүзәл. - Беҙ ағайым менән һөйөү тойоп үҫтек, бала сағыбыҙ бәхетле булды. Ата-әсәләр беҙҙе намыҫлы, ғәҙел булырға, кешеләргә, уларҙың статусына ҡарамай, ихтирам менән ҡарарға өйрәтте. Хәҙер улар үҙ мөхәббәтен балаларыбыҙға бүләк итә, улар тураһында хәстәрлек күрә. Ейәндәре уларҙы ярата, шатланып улар янына ҡайталар.

- Ғаилә һәм тоғролоҡ бик мөһим төшөнсәләр. Әгәр бында барыһы ла яҡшы икән, башҡаһы ла яҡшы буласаҡ, - тип өҫтәй Вәзимә Кәлимулла Ҡыҙы. - Иремдең яуаплы вазифалар биләүен, уға ышаныслы тыл кәрәклеген аңланым, һәр ваҡыт өйҙә бөхтәлек булды, йылы ашым әҙер ине, балаларҙә тәрбиәләнем.

Миңлерәис Миңлеғәли улы ҡатыны тураһында тик яратыу, хөрмәт менән һөйләй. Ситтән тороп өс юғары белем ала һәм Вәзимә Кәлимулла ҡыҙ һәр саҡ уның терәге булып тора. Ветеринария участкаһы мөдиренән алып Башҡортостан Дәүләт Йыйылышы – Ҡоролтайҙың Вәкилдәр палатаһы рәйесенә һәм Рәсәй Федераль Йыйылышының Федерация советында республика вәкиленә тиклем үҫеш юлы үткән кеше булараҡ, ул ҡатынының үҙенең карьера үҫешендә ҙур өлөш индерҙе һәм ярҙамы ҙур булды, тип иҫәпләй. 2000 йылда ул Башҡортостан дәүләт хеҙмәте һәм идара итеү академияһы доценты, докторлыҡ диссертацияһын яҡлай һәм иҡтисад фәндәре докторы дәрәжәһен ала. Ҡайҙа ғына барһа ла - сит илдәргә йәки республикаға эш сәфәре менәнме - өйҙә барыһы ла яҡшы булыуына ышана. Ул әле лә дәүләт эштәренән бөтөнләй ситләшмәгән, уны йыш ҡына Стәрлетамаҡҡа һәм Өфөгә консультацияларға саҡыралар.

Башҡортостанды атҡаҙанған уҡытыусыһы Вәзимә Кәлимулла ҡыҙы - ижади кеше, ул шиғырҙар яҙа. Матурлыҡты ярата, баҡсала һәм өйҙә төрлө сәскәләр үҫтерә. Бик яҡшы аш-һыу әҙерләүсе, уның бешергән ризыҡтарын барыһы ла ярата.

Балалар һәм ейәндәр олатай-өләсәйҙәренең, ата-әсәләренең йолаларын дауам итә. Улар өсөн иң ҙур шатлыҡ – яҡындарын сәләмәт һәм бәхетле итеп күреү. Талбазыға теләп ҡайталар, ярҙам итәләр, уларҙың бай һәм сағыу тормошона шатланалар. Хәҙер Ҡытайға барыу мөмкинлеге лә бар, сөнки ейәндәренең береһе ҡытай ҡыҙына өйләнгән. Уларҙың бер-береһенә ҡарата ихтирамлы һәм хөрмәтле мөнәсәбәте, мөхәббәте һәм үҙ-ара аңлашп йәшәй белеүе һлҡдандыра, уларҙың ғаиләһе шуның менән ныҡлы.

Бриллиант туй – ул һирәктәрҙең бәхете. Бер-береһенә 60 йыл ғүмерен бағышлаған кешеләр ысын ихтирамға лайыҡ. Ишморатовтар - татыу һәм ныҡлы ғаилә өлгөһө, уларҙың никахы ла был датаның символы – алмаз кеүек ныҡлы.