АУЫЛДА БӘПЕСТӘР КҮП ҮҪҺЕН!

Түрһәгәҙе ауылында йәшәүсе Дауытовтар - күп балалы ғаилә. Улар ике малай, ике ҡыҙ үҫтерәләр. Иң өлкәне Илфат инде һигеҙенсе класта уҡый, көрәш секцияһында уңышлы шөғөлләнә. Айгүзәл ҡыҙҙары дүртенсе класс уҡыусыһы, улдары Илдус беренсе класта уҡый. Ә иң кескәй ҡыҙҙарына Айлина тип исем ҡуштылар. Ғаилә дәүләттән субсидия ярҙамы алды, матур ҙур йорт һалып сыҡты. Рифат - механизатор, ә Лилиә - мәктәптә ашнаҡсы, әле декрет ялында. 

Бәпес үҫтерергә олатай, ике өләсәй, туғандар, күрше-тирә килде. Кескәйгә һамаҡтар, теләктәр әйтеп, ғаиләгә именлек, бәрәкәтле тормош, балаларҙың һау-сәләмәт һәм итәғәтле булып үҫеүҙәрен теләнеләр.

Ауылда бындай йола байрамдары иҫерткес эсемлектәрһеҙ, халыҡ традицияларына нигеҙләнеп үткәрелә. Улар йәштәргә сәләмәт тормош рәүеше өлгөһө булып тора.