Ay Yola Башҡортостанды яратыуы тураһында белдерҙе

Башҡортостандың баш ҡалаһында Бөтә Рәсәй балалар фольклориадаһының өсөнсө көнө тамамланды.

Бөгөн сәхнәгә Бөтә Рәсәйҙән күп һанлы коллективтар сыҡты. Совет майҙанында илебеҙҙең бөтә халыҡ коллективтары сығыш яһаны. Тамашасыларҙы Рязань өлкәһенән «Заряночка», Силәбе өлкәһенән «Беседушка», Иваново өлкәһенән «Калинушка» ансамблдәре ҡыуандырҙы.

Курск өлкәһенән Евгений, Ирина Һәм Ариадна Шестопаловтарҙың ғаиләһе Өфөнө үҙенең ижады менән яулап алды. Ариаднаның көслө һәм матур тауышы күңелдәрҙе елкендерҙе. Ижади ғаилә ҙур юғалтыу кисерҙе: Суджунан киткәс, улар 30-ға яҡын уникаль Курск костюмы һәм бөтә музыка ҡоралдарын ҡалдырған. Күп йыллыҡ хеҙмәт һәм уникаль коллекция кире ҡайтарырлыҡ түгел кеүек тойола. Әммә бөтә Рәсәйҙән фольклор коллективтары ярҙамында юғалтылғанды өлөшләтә тулыландырыу мөмкин була. Ариадна һәм уның ата-әсәһе тыуған еренә ҡайта аласағына ышана.

Күп тамашасыларға Хабаровск крайынан «Яло» фольклор-этнографик ансамбле лә тамашасылар хәтерендә ныҡлы ҡалды.

Һәм, әлбиттә, Аy Yola хедлайнерын тамашасылар ҙа, фестивалдә ҡатнашыусылар ҙа көтә. Балалар үҙҙәренең кумирҙарын ҡарарға тип сәхнәгә яҡыныраҡ урын алырға ашыҡты. Ay Yola төп хиттарын башҡарған саҡта уҡ Ринат Рамазанов бөтәһен дә мөмкин тиклем яҡыныраҡ килергә саҡырҙы, һәм балалар, шатлығын йәшермәйенсә, алға килде.

Сәхнәгә сығыр алдынан Ринат Рамазанов, Адель һәм Руслан Шәйхетдинов журналистар менән аралашты. Асыҡланыуынса, Ay Yola күптән инде бишек йырын яҙырға ниәтләй.

- Бындай планды күптән күңелдә йөрөтәбеҙ. Асылда, беҙҙең бөтә йырҙарыбыҙ балалар тәрбиәһе өсөн яраҡлы, мәғәнәһен аңлаһаҡң. Бөтә ижадыбыҙ халҡыбыҙҙың бриллианты — «Урал Батыр» эпосы тирәләй ҡоролғанын иҫкә төшөрөргә теләйем. Һәр йыр дөрөҫ һайлау яһарға кәрәклеге тураһында һөйләй. Беҙ күптән бишек йырын яҙҙырырға хыялланабыҙ. Уны ижад итеү барышындабыҙ һәм яҡын арала ишетерһегеҙ, тип әйтә алам, — тип уртаҡлашты Руслан Шәйхетдинов.

— Уңышығыҙҙың сере нимәлә?

- Асыҡ йөрәктәрҙә. Ижадта кешеләр ялғанлауҙы бик нескә тоя. Барыһы ла ысын күңелдән, саф йөрәктән эшләнгәндә, был өлкәндәрҙең дә, балаларҙың да йөрәгендә сағылыш таба. Беҙ былтыр бик күп илдәрҙе, Бөтә Рәсәйҙе урап үттек. Һәм бөтә концерттарыбыҙҙа беҙгә бик бәләкәй балалар һәм 80 йәштән уҙған өлкәндәр килә. Һәр кеше-бала. Әгәр кеше ғүмерендә бала сағын йөрәгендә йөрөтә икән, ул саҡта ул изгелекле һәм ялҡынлы.

— Үҙең булыу һәм оҡшағанды эшләү генә мөһим, - тип өҫтәй Ринат.

— Бөгөн һеҙ тамашасыларға нимәне еткерергә теләйһегеҙ?

- Һәр ваҡыттағыса «Урал Батыр» эпосы тураһында. Беҙҙең сығышыбыҙ концерт ҡына түгел, һәр йыр эпостың иң мөһим бүлеге. Бөгөн беҙ тамашасылар өсөн бер аҙ аңлатма әҙерләнек. Беҙҙә нимә булғанын аңлатыусы, тыңлаусыны әҙерләүсе заставкалар бар. Беҙҙең музыка төрлө форматта. Һеҙ ҡаты дабстеп биттарын да, йомшаҡ хаус-ритмдарын да, Аҡбуҙат күктән төшкәндә  , көслө драм-н-бейсты ла ишетә алаһығыҙ. Был «Урал Батыр» донъяһына алып ингән ҙур төҫлө палитра. Рәхим итегеҙ!

— Башҡортостанда һеҙҙең ижадты һөйөүселәр күрергә тейешле урын бармы?

— Улар бик күп, әммә Башҡортостанда һәр беребеҙҙең яратҡан урыны бар, — ти Руслан. — Бала саҡтан яратҡан урыным - Салауат Юлаев һәйкәле. Мин һәр ваҡыт был күренеш, ҡеүәт, тарих менән һоҡландым. Яҡын киләсәктә уны ҡабат күрә алырбыҙ тип ышанам. Бөтә республикабыҙҙы яратам. Уралды - беҙҙең тауҙарҙы мотлаҡ ҡарарға кәрәк. Беҙ Башҡортостандың төрлө урындарында төшәбеҙ, ул шул тиклем төрлө һәм бөтә ерҙә лә бик матур, хатта бер урынды айырып күрһәтеүе лә ҡыйын

— Өфө тураһында һүҙ йөрөткәндә, Салауат Юлаев баҡсаһын бик яратам, унда аҫылмалы күпер һәм беседкалар бар, - тип таный Адель. - Был минең яратҡан паркым. Тәбиғәт урындарынан мин Ирәмәлде бик яратам, быйыл күтәрелергә теләйбеҙ. Һәм, әлбиттә, Торатауҙы яратам.

Источник: mgazeta.com