Төрөмбәт мәҙәниәт йортонда ифтар мәжлесе үтте

Изге Рамаҙан айында мәҙәниәт хеҙмәткәрҙәре Рәсимә менән Айнур Сәйфетдиновтар «Үҙебеҙҙекеләр өсөн» («Zа своих») тигән исем менән ауылдаштарын ифтар ашына йыйҙылар.

Даян хәҙрәт махсус хәрби операцияла илебеҙҙе һаҡлап һәләк булғандар рухына доғалар бағышланы. Шулай уҡ әлеге көндә алғы һыҙыҡтағыларҙың һәм хәрби госпиталдәрҙә дауаланыусы яугирҙәрҙең именлеге өсөн дә теләктәр әйтелде. Ауыл ҡатын-ҡыҙҙары, ир-егеттәре хәҙрәттең вәғәздәрен, Рамаҙан айы, ураҙа тотоу сауабы тураһында һөйләгәнен тыңланы.

Аҙан әйтеп, ауыҙ асҡандан һуң, намаҙ уҡылды. Ауылдың аш-һыуға оҫта, һәр үткәрелгән саранан ситтә ҡалмаған ҡатын-ҡыҙҙары бай табын әҙерләгән. Был мәжлесте ойоштороуҙа һәм үткәреүҙә үҙешмәкәр сәнғәттә ҡатнашыусы Инира Әсфәндийәрова, Гөлназ Ғәлимова, Зәлиә Ибраҡова, Алина Назарова ҙур ярҙам күрһәткән.

Ифтарҙы ойоштороусылар рәхмәттәр ишетеп, ошолай юғары кимәлдә табын үткәреүгә үҙҙәренең өлөшөн индереп, икеләтә сауап алдылар. Пәйғәмбәребеҙҙең бер хәҙис-шәрифендә: «Кем дә кем ураҙа тотоусыларға ифтар мәжлесе уҙғара, ул ризыҡландырған һәр кешенең ураҙа сауабы ауыҙ астырған кешегә лә яҙыла», тиелгән бит.

Эйе, илебеҙҙә, йорт-еребеҙҙә тыныслыҡ урынлашып, бөгөнгө көндә һуғыш эсендәр йөрөгән ир-егеттәребеҙ иҫән-имен тыуған йорттарына әйләнеп ҡайтһындар. Уларға ныҡлыҡ, рух көсө, иҫәнлек, уңыштар юлдаш булһын. Киләсәктә лә шулай изге байрамдарҙа, тыныслыҡ-именлектә генә осрашырға яҙһын, тигән теләктә таралышты ифтар мәжлесенән төрөмбәттәр.