Рәшит Назаров исемендәге муниципаль премияның беренсе лауреаттары кемдәр?

Беренсе лауреат-башҡорт шағиры, журналист Риф Мифтахов. Ул яҡташыбыҙҙың ижади мираҫын тикшереүгә тиҫтәләгән йылдарын бағышлай, уның хеҙмәттәре арҡаһында бер нисә шиғырҙар йыйынтығы һәм ике томлыҡ нәшер ителә. Премияны Риф Фәйзрахман улының ҡатыны Хөрмә Мифтаховаға тапшырыласаҡ. Икенсе номер аҫтында таныҡлыҡты район хакимиәте башлығы Арыҫлан Шәһәретдинов «Аҡбуҙат» журналының баш мөхәррире Лариса Абдуллинаға  тапшырҙы. Лариса Хашим ҡыҙы барыһына ла күрһәткән ышанысы өсөн рәхмәт әйтте:

- Мин бик тулҡынланам, был минең өсөн көтөлмәгән хәл булды. Юғары баһағыҙ өсөн ҙур рәхмәт. Был көнгә беҙ бай багаж менән килдек, тип әйтә алабыҙ. Рәшит ағайҙың рухы шатланһын. Беҙгә уның ижадын өйрәнергә, уға бөтә донъя билдәлелеге бирергә кәрәк әле.

Рәшит Назаров исемендәге муниципаль премия ике йылға бер биреләсәк. Уның суммаһы 12 мең һум тәшкил итә. Шулай уҡ күкрәккә тағыла торған Почетлы билдә менән танытма тапшырыла.

Белешмә

- 2014 йылда, Рәшит Назаровтың 70 йәшлек юбилейы хөрмәтенә тыуған ауылы Төрөмбәттә «Рәшит Назаров аллеяһы» асылды һәм унда 70 шыршы үҫентеһе ултыртылды.

 - 2022 йылдың 15 авгусында, Бөтә донъя башҡорттары ҡоролтайы иғлан иткән Башҡорт мәҙәниәте һәм рухи мираҫы йылында, Талбазы башҡорт гимназияһына Рәшит Назаров исеме бирелде. Йыл һайын Талбазы башҡорт гимназияһында шағир ижады буйынса ғилми-ғәмәли конференциялар, уҡыусылар конкурстары үткәрелә.

-  2022 йылдың 30 авгусында шағирҙың тыуған мәктәбендә мемориаль таҡтаташ асылды.

- 2024 йылдың 15 майында гимназия территорияһында шағирҙың бюсы асылды.

- 2022 йылдың 21 ноябрендә Рәшит Назаров исемендәге муниципаль премия булдырылды.

- 2024 йылдың 6 ноябрендә тәүге премиялар беренсе лауреаттарға тапшырылды.