Ауырғазыла – тарихи ваҡиға

Быйыл С.Юлаев исемендәге дәүләт, Ғ.Ибраһимов исемендәге район премиялары лауреаты, үҙенсәлекле һәм ҡабатланмаҫ шағир Рәшит Сәйетбаттал улының юбилей йылы – тыуыуына 80 йыл. Уның исемен ике йыл инде Талбазы башҡорт гимназияһы йөрөтә.

Бына бөгөн гимназия тарихына әһәмиәтле тағы бер бит өҫтәлде Уҡыу йорто коллективы һәм уҡыусылары «Мәктәп башланғысын бюджетлау» проектында ҡатнашып, гимназия территорияһына Рәшит Назаров бюстын ҡуйыуҙы хәл иткәйне. Бюстың авторы Өфө скульпторы Илдус Зәкиров булды. Ниһайәт, уны асыу тантанаһы ла килеп етте.

Өфөнән бик күп мәртәбәле ҡунаҡтар, билдәле яҡташтар, тыуған ауылы Төрөмбәттән һәм башҡа битараф булмаған кешеләр оло сараға йыйылды.

Бюсты асыу хоҡуғы Башҡортостан яҙыусылар союзы рәйесе Айгиз Баймөхәмәтовҡа, гимназия директоры Светлана Юлмөхәмәтоваға, баланғыс кластар уҡытыусыһы Светлана Атмасоваға, унынсы класс уҡыусыһы Байрас Назаровҡа бирелде.

Һуңынан барыһы ла сәскәләр һалды. Хәҙер Рәшит Назаров һәр көн балаларҙы мәктәпкә ҡаршы алып, оҙатып торасаҡ. Ул уларҙы ижадҡа, яҡшы уҡыуға, илһөйәр, намыҫлы булырға, яҡшы эштәргә әйҙәп торһон!

Беҙ үҙебеҙҙең арҙаҡлы шәхесебеҙҙе онотмайыҡ, ололайыҡ, киләсәк быуындарға уның әҙәби мираҫы барып етһен!