БАШҠОРТОСТАНДА БИШЕНСЕ ТАПҠЫР БАШҠОРТ ТЕЛЕ КӨНӨН БИЛДӘЛӘЙҘӘР

Байрам алдынан республиканың мәғариф ойошмаларында башҡорт теле һәм әҙәбиәте буйынса төбәк-ара олимпиада сиктәрендә «Башҡорт телендә һөйләшәм»флешмобы үтә. Уҡыусылар Һәм уҡытыусылар «Башҡорт телендә һөйләшәм» йырын башҡара. Был йырҙың һүҙҙәрен Рәшит Шәкүр яҙған,  ә Мөхәррәм Сәлимов көй һалған. Видеояҙмалар #башҡорттелекөнө2023, #башҡорттелендәһөйләшәм хештегтары менән социаль селтәрҙәрҙә урынлаштырыла.

Милли мәғариф идаралығының Бәйләнештә https://vk.com/unominobr битендә төрлө конкурстарҙа еңеүсе башҡорт теле һәм әҙәбиәте уҡытыусылары тураһында мәҡәләләр урынлаштырыла. Йыл һайын башҡалала Башҡорт теле Көнө БДПУ майҙанындағы М.Аҡмулла һәйкәленә сәскәләр һалыуҙан башлана. Байрам башҡорт шағиры Һәм мәғрифәтсеһе М.Аҡмулланың тыуған көнөнә арнала. Бөтә дөйөм белем биреү ойошмаларында Башҡорт теле көнөнә арналған берҙәм дәрес уҙғарыла.

Шулай уҡ бөгөн РФ президенты иғлан иткән Уҡытыусы һәм остаз йылы сиктәрендә Өфөлә «Остаз»республика конкурсының финалы үтәсәк. Дөйөм белем биреү ойошмалары араһында «Иң яҡшы башҡорт теле һәм әҙәбиәте кабинеты» һайланасаҡ. Еңеүселәр кабинетты мультимедиа комплексы менән йыһазландырыуға сертификаттар аласаҡ.

Көн дауамында республиканың урта һәм юғары уҡыу йорттары студенттары өсөн оҫталыҡ дәрестәре, интеллектуаль уйындар, Аҡмулла олимпиадаһы, башҡорт телендә КВН үткәреләсәк. Байрам китапханаларҙа, тарихи-мәҙәни үҙәктәрҙә үтәсәк.

Киске программа Өфө театрҙарында спектаклдәр менән дауам итәсәк: Мостай Кәрим исемендәге Башҡорт милли йәштәр театрында «Мин башҡорт телен өйрәнәм» спектакленең премьераһы була. Башҡорт дәүләт опера һәм балет театрының ҙур залында башҡорт әҙәбиәте классигы Мостай Кәримдең «Ай тотолған төндә» пьесаһы буйынса "Ай тотолған төндә" операһының концерт башҡарыуы күрһәтелә. Ә И.Иванов исемендәге Башҡорт академия драма театры. М.Ғафури «Ете быуын. Һаҡлаусылар / Беҙ... һаҡлаусылар» спектакль-вербатимына саҡыра.

Башҡортостан Республикаһының Милли музейында «Башҡорт халҡының этнографияһы» залы буйлап экскурсия һәм этно стилендәге фотосессия үтәсәк. Килеүселәрҙе шулай уҡ «Тел йәшәһә – халыҡ йәшәй»викторинаһы көтә.

«Родина» кинотеатрында башҡорт телендә «Шағир көндәлеге» фильмы һәм режиссер Булат Йосопов менән ижади осрашыу, шулай уҡ башҡорт телендә «Төньяҡ Амурҙары» тулы метражлы йәнһүрәте күрһәтелә.

15 декабрҙә «Торатау» конгресс-холында Фән һәм мәғариф йылына йомғаҡ яһау сиктәрендә республика райондары һәм ҡалалары, РФ субъекттары башҡорттары ҡоролтайҙары етәкселәре һәм вәкилдәре осрашыуы, шулай уҡ мәҙәниәт, гуманитар фәндәр һәм мәғариф өлкәһендә С.Тавасиев исемендәге йәмәғәт наградаһының тәүге еңеүселәрен бүләкләү үткәрелә.. Башҡорт телен һаҡлау һәм үҫтереү буйынса автономиялы коммерцияға ҡарамаған ойошма үткәргән башҡорт телен үҫтереүгә йүнәлтелгән проекттар конкурсында еңеүселәргә сертификаттар тапшырыласаҡ. Йәштәр медиаһы, IT, мәғариф, мәҙәниәт һәм фән өлкәһендә телде һаҡлауға һәм үҫтереүгә булышлыҡ иткән 10 эш грант ярҙамы аласаҡ.

Фото: Башҡортостан Республикаһы мәҙәниәт министрлығы матбуғат хеҙмәте