9 СЕНТЯБРҘӘ БАШҠОРТОСТАНДА МИЛЛИ КЕЙЕМ КӨНӨ БИЛДӘЛӘНӘ

Байрам халыҡтарҙың йолаларына, тарихына һәм мәҙәниәтенә ҡабаттан мөрәжәғәт итеү, үҫеп килеүсе быуында халыҡ мәҙәниәтенең байлыҡ һәм ҡиммәт икәнлеген аңлау тәрбиәләү мөмкинлеген бирә. Республикала байрам 2020 йылдан йылына ике тапҡыр - апрелдең өсөнсө йомаһында һәм сентябрҙең икенсе йомаһында уҙғарыла.

Быйыл Милли кейем көнөн республикала ғына түгел, унан ситтә лә билдәләйҙәр. Мәҫәлән, 7-11 сентябрҙә Белорус тарихи-мәҙәни үҙәге һәм ХМАО-Юграла Башҡорт тарихи-мәҙәни үҙәге «Милли кейемдә фото» онлайн-күргәҙмәһен, шулай уҡ «Мин милли кейемдә» флешмобын ойоштора. 9 сентябрҙә «ҠыҙылЯр» рус тарихи-мәҙәни үҙәге акцияны Ҡырымдың Белогорск районында уҙғара.

Башҡортостанда 9 сентябрҙә Милли кейем көнөнөң төп ваҡиғаһы - «Милли кейем байрамы». Сара Өфөнөң Яҡутов исемендәге паркында ойошторола. Килгән ҡунаҡтар костюмдар, халыҡ оҫталары эштәре күргәҙмәһен, концерт ҡарай ала.

Башҡортостан райондарында ла ҙур программа көтөлә. Республиканың төрлө мөйөштәрендә милли кейемдәр күргәҙмәһе, ошо темаға флешмоб, ҡатын-ҡыҙ биҙәүестәре, башҡорт түшелдеректәре эшләү, традицион ҡатын-ҡыҙ күлдәктәрен бесеү һәм тегеү буйынса оҫталыҡ дәрестәре ойошторола.

(Республика баҫмаларынан).