Бөтә яңылыҡтар
Мәҙәниәт
5 Апрель 2021, 12:30

ИЖАДИ КОНКУРСТАН СИТТӘ ҠАЛМАҒЫҘ!!!

Өфөлә Мостай Кәрим исемендәге фонд һәм «Шоңҡар» журналы башҡорт телендә шиғырҙар, проза әҫәрҙәре яҙған йәш әҙиптәр өсөн «Йондоҙҙарҙай күреп, мин күҙҙәргә ҡарап барамын…» конкурсын ойошторҙо, тип хәбәр итә «Башинформ» мәғлүмәт агентлығы.

Журналдың март һанында положение һәм тәүге ҡатнашыусыларҙың эштәре баҫылған.
Мостай Кәрим исемендәге фонд башҡорт телен һаҡлауға һәм үҫтереүгә үҙ өлөшөн индергән һәләтле йәштәргә һәр яҡлап ярҙам күрһәтә, тип белдерә фонд директоры Әлфиә Кәримова.
«Шоңҡар» журналы социаль селтәрҙә йәштәр менән әүҙем эшләй, хеҙмәткәрҙәр республика райондары буйлап командировкаларға сыға, әҙәбиәттә тәүге аҙымдарын яһаған ижадсылар менән таныша.

«Әлфиә Мостай ҡыҙы һәм Фонд хеҙмәткәрҙәре менән бер әңгәмәлә «Йондоҙҙарҙай күреп, мин күҙҙәргә ҡарап барамын…» конкурсын үткәреү идеяһы тыуҙы. Декабрҙә эштәргә йомғаҡ яһала, башҡорт әҙәбиәтен һөйөүселәргә йәш шағирҙарҙың һәм яҙыусыларҙың яңы исемдәре асылыр», - тип ышанысын белдергән журналдың баш мөхәррире, билдәле яҙыусы Айгиз Баймөхәмәтов.

Конкурстың шарттары менән бер аҙ таныштырып китәйек (уларҙы тулыраҡ “Шоңҡар” журналы сайтында табырға була).

- Йәш әҙәбиәтселәрҙең башҡорт телендә яҙылған эштәре ҡабул ителә;

- конкурсанттар 18-35 йәштә булырға тейеш;
- эштәр ике номинацияла ҡабул ителә: «Поэзия» (шиғырҙар, поэмалар һ.б.) һәм «Проза» (хикәйәләр).
- конкурсҡа быға тиклем матбуғатта, интернетта баҫылмаған, конкурстарҙа ҡатнашмаған эштәр генә алына. Ҡатнашыусының социаль селтәрҙәге шәхси аккаунтында йәки шәхси блогында, шәхси Youtube каналында ғына һәм мәктәп гәзитендә генә баҫылған эштәрҙең ҡаралыуы мөмкин.
Ижади эштәр 2021 йылдың 15 мартынан 1 декабргә тиклем ҡабул ителә.
Уларҙы журналдың [email protected] электрон адресына «Республиканский конкурс молодых литераторов» тигән аңлатма менән ебәрергә кәрәк. Исем-шәрифтәрҙе, йәште, адрес, контакттарҙы күрһәтергә, шулай уҡ яҡшы сифатлы портрет фотоһы ҡушырға.
Читайте нас в