Өфө вуз-ара кампусында баш архитекторҙар өсөн белем биреү программаһы эшләй

Уҡытыуҙың маҡсаты-ҡала һәм ауыл биләмәләрен үҫтереү туранан-тура ҡарарҙарына бәйле булған белгестәрҙең профессиональ кимәлен күтәреү. Программа практик һынау үткән: ғинуар аҙағында тыңлаусыларҙың беренсе сығарылышы булған.

Дипломдарҙы тапшырыу тантанаһы Башҡортостандың төҙөлөш һәм архитектура министры урынбаҫары Александр Борисов ҡатнашлығында Вуз-ара кампус майҙансығында үтте. ӨДНТУ-нан университетты үҫтереү программаһы етәксеһе Дмитрий Кузнецов, «Архитектура» кафедраһы мөдире Светлана Байморатова һәм өҫтәмә белем биреү программаһы етәксеһе Рәмил Байморатов сығыш яһаны. Беренсе ағымда уҡыуҙы республиканың алты районының - Нуриман, Ҡыйғы, Благовещен, Иглин, Тәтешле һәм Краснокама райондарының баш архитекторҙары тамамланы.

- Биләмәләрҙе үҫтереү урындарҙа компетентлы ҡарарҙарҙан башлана. Бөгөн муниципалитеттарҙың баш архитекторҙарының - көн һайын ҡалаларыбыҙҙың һәм ауылдарыбыҙҙың йөҙөн формалаштырыусыларҙың профессионализмына стратегик ставка яһала. Райондың ҡала төҙөлөшө сәйәсәте өсөн яуаплы белгес территориаль планлаштырыу һәм киңлекте үҫтереү буйынса заманса инструменттарға эйә булғанда, уның һәр сиселеше стратегик мәсьәләләрҙе төбәк халҡы мәнфәғәтенә аныҡ, уйланылған сиселештәргә әйләндерә, — тип билдәләне Александр Борисов.

Туғыҙ ай дауамында ҡатнашыусылар ҡала көйләү нигеҙҙәрен, территорияларҙы анализлауҙы, ҡала төҙөлөшөн проектлауҙы һәм арауыҡ үҫеше сценарийҙарын өйрәнә. Йомғаҡлау эше булып һәр муниципаль райондың үҙенсәлектәрен һәм потенциалын иҫәпкә алып, уның арауыҡ үҫеше концепцияһын эшләү тора.

- Бөгөн күп кенә муниципалитеттар ҡала төҙөлөшө сәйәсәте өсөн яуаплы белгестәрҙең махсус белемгә эйә булмауы менән осраша. Беҙҙең программа уларға теоретик белем генә түгел, документация, территориаль планлаштырыу һәм үҫеш концепцияларын әҙерләү менән эшләү өсөн практик инструменттар ҙа бирҙе, — тип билдәләне ӨДНТУ-ның «Архитектура» кафедраһы мөдире Светлана Байморатова.

Программаны әҙерләгәндә «Тормош өсөн инфраструктура», «Һөҙөмтәле транспорт системаһы» һәм башҡа милли проекттарҙың положениелары, шулай уҡ 2023-2024 йылдарҙа ӨДНТУ-ның архитектура кафедраһы тормошҡа ашырған «Ҡала мөхите сифатын цифрлы идара итеү ысулдары» ғилми проектының һөҙөмтәләре иҫәпкә алынды. Уҡыуға юғары уҡыу йорто уҡытыусылары ғына түгел, БР Төҙөлөш министрлығы, Республика ҡала төҙөлөшө үҙәге белгестәре һәм башҡа төбәктәрҙән эксперттар ҙа йәлеп ителде.

Тыңлаусылар үҙҙәре курстың ғәмәли ҡиммәтен билдәләй.

- Ауыл ерендә һәр планлаштырылған ҡарар кешеләрҙең тормошона йоғонто яһай. Бында нормативтарҙы ғына түгел, территорияның үҙенсәлектәрен, уның торошон һәм реаль бурыстарын да иҫәпкә алыу мөһим, — тип аңлатты программала ҡатнашыусыларҙың береһе, Нуриман районы хакимиәтенең архитектура бүлегенең баш белгесе Тимур Ғилманов. - Курстарҙа беҙҙе стратегик фекерләргә һәм райондар биләмәһен тотороҡло һәм уйланылған үҫтереүгә булышлыҡ иткән ҡарарҙар ҡабул итергә өйрәттеләр.

Тәүге сығарылыш уҡыусылары билдәләүенсә, программа белем биреү проекты ғына түгел, ә тәжрибә уртаҡлашыу өсөн майҙансыҡ та булып тора. Икенсе комплект асылған да инде - уҡытыу февралдә башлана.

Белешмә.

Рәсәй Президенты Владимир Путин ҡушыуы буйынса илдә заманса кампустар селтәре булдырыла. 2030 йылға 25 кампус барлыҡҡа килергә тейеш. Эште Рәсәй Федерацияһы Хөкүмәте һәм Рәсәй Мәғариф һәм фән министрлығы алып бара. Хәҙер «Йәштәр һәм балалар» милли проекты ярҙамында 24 кампус проектлана һәм төҙөлә. 2036 йылға кампустар һаны 40-ҡа тиклем артасаҡ.

Өфөләге юғары уҡыу йорттары ара кампусы - был 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялар, эшлекле зоналар, магазиндар, скверҙар һәм башҡа уңайлы ҡала мөхите объекттары булған студенттар киңлеге.

#молодежьидети

#нацпроектмолодежьидети