Ауырғазы районы "шайморатовсылары" Өфөлә балда ҡатнашты

Мораҙым ауылы мәктәбенең «шайморатовсылар» класы уҡыусылары Өфөлә «Йәш шайморатовсылар балы»нда ҡатнашып, үҙҙәрен юғары кимәлдә күрһәтте! 

Сарала ҡатнашыу алдынан уҡыусылар директор кәңәшсеһе Раушания Ҡоҙашева етәкселегендә Өфөлә хореографтар менән етди күнекмәләр үтте. Улар башҡорт вальсында ла, полонез һәм лансье бейеүҙәрен башҡарыуҙа ла оҫталыҡтарын күрһәтте һәм һынатманы. Йәнле оркестр, иҫкиткес матур күлдәктәр һәм нәфис вальс хәрәкәттәре бер кемде лә битараф ҡалдырманы, байрам атмосфераһын ысын кимәлдә тойорға мөмкинлек бирҙе. Уҡыусылар яңы күнекмәләр алып, ҙур сарала ҡатнашыуҙан тәьҫирләнеп ҡайтты.

Бал Ватанды һаҡлаусылар йылына, Батырҙар, Конституция һәм Башҡорт теле көндәренә арналды. Башҡортостан башлығы Радий Хәбиров ҡатнашыусыларҙы сәләмләне, хәтерҙе һәм традицияларҙы һаҡлауҙың мөһимлегенә баҫым яһаны!