Яңыртылған спорт залы – яңы мөмкинлектәр

2019-2024 йылдарҙа Башҡортостанда мәғариф инфраструктураһы әүҙем үҫтерелде. Республика етәкселегенең мәктәптәрҙе ремонтлауға ғаризалар биреү процесына шәхси контроле арҡаһында төбәк ошо маҡсатҡа федераль финанслауҙы йәлеп итеү буйынса алдынғы урынға сыҡты.

Шулай уҡ йыл һайын Ауырғазы районында ла бюджеттың 60 проценты уҡытыу сараларын тотоуға, ремонтлауға, яңыртыуға һәм мәғариф өлкәһе хеҙмәткәрҙәренең эш хаҡына йүнәлтелә. 2024 йылда финанслау күләме 712 миллион һумдан ашыу тәшкил итә. «ППМИ» һәм «Реаль эштәр» программалары сиктәрендә ремонт эштәренә 6 миллион һум самаһы аҡса бүленгән.

Был башланғыстарҙы уңышлы тормошҡа ашырыуҙың сағыу миҫалдарының береһе булып Талбазы ауылының 3-сө мәктәбендә спорт залын ремонтлау тора. «Мәғариф» милли проектының «Һәр баланың уңышы» төбәк проекты сиктәрендә мәктәп эштәрҙе үткәреүгә дәүләт субсидияһы алды. Яңы уҡыу йылында уҡыусылар иркен, яҡты һәм заманса спорт залына килде. Бында яңы ишектәр ҡуйылған, иҙән һәм стеналар ремонтланған, уңайлы кейенеү бүлмәләре йыһазландырылған, яҡтыртыу яңыртылған. «Спорт залы заманса һәм яңыртылған. Хәҙер бында шөғөлләнеү күпкә күңеллерәк һәм уңайлыраҡ», - ти уҡыусылар.

Уҡыу һәм спорт менән шөғөлләнеү өсөн уңайлы шарттар булдырыу – ул балаларҙың киләсәгенә өлөш индереү генә түгел, ә сәләмәт һәм әүҙем быуынды үҫтереүгә мөһим аҙым да.

Рифат Әбсәләмов, , Талбазы ауылының 3-сө урта белем биреъ мәктәбе директоры:

- Ремонт эштәренә сығымдар 600 мең һумдан ашыуыраҡ тәшкил итте. Стеналарҙың, түшәмдең һәм иҙәндең торошона айырыуса иғтибар бүленде, шулай уҡ ишектәр һәм яҡтыртыу алмаштырылды. Спорт залы яҡтыраҡ һәм уңайлыраҡ булып китте. Уҡыусыларыбыҙ бында үҙ һаулығын нығытасаҡ. Дәүләт ярҙамы беҙҙе максималь көс менән эшләргә дәртләндерә. Яңы уҡыу йылында ла грант конкурстарында ҡатнашырға ниәтләйбеҙ.