Мәктәп яңынан уҡыусыларға ишектәрен асты. Икенсе ҡаттағы фойе байрамса биҙәлгән. Ата-әсәләр, ветеран уҡытыусылар, саҡырылған ҡунаҡтар килде.

Традиция буйынса, тантана дәүләт флагтарын индереүҙән башланды. Мәктәп директоры Эльвира Исламғолова байрам менән ҡотланы, һәйбәт өлгәшкән уҡыусылар тураһында әйтеп үтте. Наградаларға лайыҡ булған уҡытыусыларҙы билдәләп үтте. Август конференцияһында мәктәптең директор урынбаҫары  Гөлнара Хөсәйенова Башҡортостан Республикаһы мәғариф һәм фән министрлығының Маҡтау грамотаһы, татар теле һәм әҙәбиәте уҡытыусыһы Дилиә Тимербулатова Татарстан Республикаһының мәғариф һәм фән министрлығының түшкә таға торған билдәһе менән бүләкләнгән.

Яңы Кәлсер ауыл советы биләмәһе башлығы Раил Диваев, Рәсәй Эске эштәр министрлығының Ауырғазы районы буйынса миграция бүлексәһе начальнигы Азамат Ибраһимов барыһын да байрам менән ҡотлап үтте.

Быйыл мәктәпкә беренсе класҡа биш бала килгән. Улар тәү тапҡыр мәктәп партаһы артына ултыра. Уҡытыусылары менән фән үрҙәренә сәйәхәткә сыға. Серле лә, мөғжизәле лә Белем илендә тик уңыштар юлдаш булһын.

 Мәктәп яңы уҡыу йылына тулыһынса әҙер. Спорт залы яңыртылған, Урындағы башланғыстарға булышлыҡ итеү программаһы буйынса сифатлы ремонт эшләнгән. Уҡыусыларға бар көстәрен уҡыуға йүнәлтеү, спорт менән шөғөлләнеү өсөн барлыҡ шарттар ҙа бар. Аҡ юл һеҙгә!