Ауырғазылар Рәшит Назаров юбилейын ҙурлап үткәрҙе

Хәтер көнө Рәшит Назаров исемендәге Талбазы башҡорт гимназияһы ихатаһындағы шағир һәйкәленә сәскәләр һалыуҙан башланды. Артабан Мәҙәниәт һарайы фойеһында ҡунаҡтарҙы күргәҙмәләр көтә ине: «Китап» нәшриәте хеҙмәткәрҙәре яңы баҫылып сыҡҡан «Янған йөрәк» йыйынтығы менән бергә төрлө китаптар тәҡдим итһә, «Кирач» музей-оҫтаханаһы сувенирҙары менән иғтибарҙы йәлеп итте. Милли әҙәбиәт музейының тематик күргәҙмәһенә Р.Назаров тураһында фондтан материалдар ингән. Оҫта ҡуллы Гөлфиә Ханнанова үҙенең уникаль эштәрен – сигелгән шиғырҙарын тәҡдим итте.

Сәхнәгә иң беренсе гимназия уҡыусылары сыҡты. Улар шағирҙың бала сағы тураһында мини-спектакль күрһәтте. Башҡортостандың халыҡ артисы Вилдан Яруллиндың Рәшит Назаров һүҙҙәренә яҙылған киң билдәле «Йөрәк» йырын башҡарыуы алҡыштарға күмелде.

«Рәшит Назаров-беҙҙең йөрәктәрҙә» интернет – конкурсы еңеүселәре лә бүләкләнде. Үҙәк район китапханаһы хеҙмәткәрҙәре «Ҡояш нурҙарына тотоноп» балалар һүрәттәре күргәҙмәһен әҙерләгән, унда райондың йәш рәссамдары Р. Назаров әҫәрҙәренән алған тәьҫораттарын сағылдырған. Беҙҙә талантлы уҡыусылар күп бит ул! Бынан тыш, сәхнәлә улар сәнғәтле һөйләү оҫталығын күрһәтте.

Рәсәй Дәүләт Думаһы депутаты, Бөтә донъя башҡорттары ҡоролтайы рәйесе Эльвира Айытҡолова инициативалы бюджетлау буйынса аҡса отҡан һәм уны изге эшкә йүнәлткән гимназия уҡыусыларына һоҡланыуын белдерҙе. Ойоштороусыларҙың, инициативалы төркөмдөң ҙур эшен, уҡыусыларҙың конкурстарҙа һәм байрам үткәреүҙә әүҙем ҡатнашыуын билдәләне

Р.Назаровтың оҫталығының тағы бер яғы – башҡа шағирҙарҙың ижадын анализлау һәм тәнҡитләү һәләте – ошо кисәлә асылды. Был хаҡта Милли әҙәбиәт музейы директоры Миләүшә Ҡаһарманова һөйләне. - 40 - ҡа яҡын яҙма - ҡулъяҙмалар, блокноттар, китаптар - федераль фондҡа индерелгән. Күптән түгел тағы ла 30-ға яҡын хат, ҡулъяҙма табылды. Улар араһында Назаровтың прозаһы, бәләкәй хикәйәләре лә бар. Әсхәл-Әхмәт-Хужаға яҙған хаттарында башҡорт әҙәбиәтен, яңы әҫәрҙәре күҙәтеүен, улар тураһында үҙ фекерен белдерә, хаталарға иғтибар итә. Уларҙы фәнни нигеҙләп тә бирә.

Байрамға яҡташтарыбыҙ – М.Аҡмулла исемендәге Башҡорт дәүләт педагогия университетының башҡорт филологияһы факультеты деканы, профессор Ләйлә Хөсәйенова,  доцент, «Ағиҙел» журналының яуаплы сәркәтибе Луиза Кирәева, Өфө фән һәм технологиялар университетының Стәрлетамаҡ филиалының башҡорт һәм төрки филологияһы факультеты деканы Айнур Үтәев, шағирҙың өс туған һеңлеһе Зөлфиә Назарова, шулай уҡ «Башҡортостан уҡытыусыһы» журналының баш мөхәррире Салауат Кәримов, сатирик, «Шоңҡар» журналының яуаплы сәркәтибе Венер Исхаҡовтар саҡырылды.

Тамаша залы тулы булды, алма төшөргә лә урын юҡ кеүек тойолдо. Тимәк, Рәшит Назаровтың талантын хөрмәт итеүселәр бик күп. Сара уның ижадын тағы бер тапҡыр иҫкә төшөрөргә һәм уның беҙҙең өсөн әһәмиәтен баһаларға мөмкинлек бирҙе. Ул төрлө йәштәге һәм ҡыҙыҡһыныуҙары булған кешеләрҙе берләштергән ысын мәҙәниәт һәм сәнғәт байрамына әйләнде.