Өфө Рәсәй халыҡтары Спартакиадаһы ярыштарының төп майҙансыҡтарының береһе була

Федераль спорт дирекцияһының эшсе төркөмө Өфө объекттарының көслө атлеттарҙың старттарын үткәреүгә әҙерлеген раҫланы ла инде. Был ваҡиға илебеҙ спорт тормошонда иң әһәмиәтлеләрҙең береһе генә түгел, ә 2028 йылғы Олимпия уйындарына әҙерләнәсәк милли йыйылма командаларҙы формалаштырыу өсөн һайлап алыуҙың төп этабы ла булып тора, — был хаҡта алдан Рәсәй Федерацияһының спорт министры, Рәсәй Олимпия комитеты рәйесе Михаил Дегтярев белдерҙе. Ул, Спартакиадала уңышлы сығыш яһау спортсыларға Рәсәй йыйылма командаһы составына тура юл аса, тип һыҙыҡ өҫтөнә алды.

Ярыштар программаһына бөтәһе 43 спорт төрө ингән. Улар буйынса турнирҙар Рәсәй Федерацияһының ете субъектында — Башҡортостан Республикаһында, Татарстан Республикаһында, Калининград, Һамар, Свердловск, Омск һәм Силәбе өлкәләрендә үтәсәк. Ҡатнашыусыларҙың дөйөм һаны 12 меңдән ашыу кеше, шул иҫәптән 8100 спортсы, 2600 тренер һәм белгес һәм 1800 спорт судьяһы.

Башҡортостан республикаһына алты спорт төрө буйынса ярыштар үткәрергә ышанып тапшырылды, һәм төбәккә 1500 самаһы ҡатнашыусы киләсәк. Улар араһында яҡынса 1100 спортсы, 250 тренер һәм белгес. 150 судья. Шул уҡ ваҡытта Башҡортостан йыйылма командаһы исеменән 33 дисциплинала наградалар өсөн көрәшкән 120 спортсы сығыш яһаясаҡ. Республикала спорт программаһы июль аҙағында уҡ башлана: 31 июлдән 4 авгусҡа тиклем шоссела велосипед спорты буйынса ярыштар, 1-4 августа — триатлон, 8-18 августа — фехтование, 14-16 августа — асыҡ һыуҙа йөҙөү, 15-19 августа — ишкәкле слалом, ә был этап 7-13 сентябрҙә спорт көрәше буйынса ярыштар менән тамамлана.

Велоспорт буйынса тәүге старттар Шишмә районында Келәш — Боголюбовка — Сайран — Яңы Троицкий — Бабик — Ҡара Яҡуп — Ар муниципаль берәмектәре биләмәһендә үтәсәк, ә триатлон буйынса ярыштар Эҫе күлдә (Теплое) үтәсәк. Өфөнөң 450 йыллығына төҙөлгән заманса спорт объекттары - Көрәш һарайы, Фехтование үҙәге, ишкәкле слалом өсөн ҡоролмалар комплексы, шулай уҡ Эҫе күл төп майҙансыҡтар буласаҡ.

Башҡортостан республикаһы хөкүмәте премьер-министры урынбаҫары — Башҡортостан республикаһының спорт министры Руслан Хәбибов билдәләүенсә, Башҡортостанда Рәсәй халыҡтары Спартакиадаһын үткәреү республиканың спорт инфраструктураһын үҫтереүҙең юғары кимәлен таныу һәм Рәсәй Федерацияһы спорт министрлығы яғынан ышаныс булып тора, ә ярыштар күләмле спорт ваҡиғаһы булараҡ ҡына түгел, ә төбәктең потенциалын, уның ойоштороу мөмкинлектәрен һәм халыҡтың спортҡа һөйөүен күрһәтеү мөмкинлеге булараҡ та ҡарала. Спартакиада иң юғары кимәлдә үтәсәк һәм Башҡортостандың спорт тарихында сағыу бит буласаҡ.

Фото предоставлено организаторами Спартакиады.