Башҡортостанда эшҡыуарлыҡҡа ярҙам: хоббиҙан бизнесҡа ҡәҙәр

Ауырғазы районы Талбазы ауылынан Илшат Зиннуров дәүләт ярҙам сараһын файҙаланып, үҙенең хоббиһын бизнесҡа әйләндерә. Гаражда урынлашҡан «ТалАғас» оҫтаханаһында ир сувенирҙар һәм ағас әйберҙәр эшләү менән шөғөлләнә. Оҫтахананы асҡас, ул ҡорамалдарға юғары хаҡ, сеймал һәм төҙөлөш материалдарына сығымдар ҙур икәнлеген аңлай. Эшҡыуар ҡорамалдарға сығымдарҙың бер өлөшөн ҡаплау өсөн документтар тапшырған һәм 300 мең һум күләмендә ярҙам алған.

Бөтә эште һанлы программа идаралығы булған станогы башҡара. Уның принцибы шундай: тәүҙә компьютерға модель индерелә һәм программа яҙыла, ул башланғыс ҡаралама һәм һуңынан төп эшкәртеү этаптарын үтә. Программа флещкаға күсерелә һәм станокка бара, һүрәт сығарыласаҡ фреза һайлана. Алдан программаланған ғәмәлдәр арҡаһында аппаратҡа төрлө ҡатмарлыҡтағы элементтар буйһона. Бәләкәй генә сувенир эшләү өсөн дә станокка йөҙҙәрсә хәрәкәт эшләү талап ителә. Мәҫәлән, өҫтәл әҙерләү өсөн һигеҙ программа яҙырға кәрәк.

Илшат Фәнил улы белеме буйынса һанлы программа идаралы станоктар программисы, шуға күрә бындай агрегатты ҡулланыуҙа ҡатмарлыҡтар тыумай. Ҙур габаритлы изделиелар эшләү мөмкинлеге булһын өсөн күп функциялы һәм ҙур станокты һайлай. Талбазылы тулы ҡиммәтле оҫтахана асыу тураһында уйлай. Ғаилә башлығын яҡындары хуплай: «Уның энергияһы күп. Һәр ваҡыт төрлө идеялар менән яна. Ағас әйберҙәр оҡшай, һәм ул уларҙы һәр ваҡыт эшләргә хыялланды. Балалар үҫте, мәктәп дәрестәре артта ҡалды, һәм, минеңсә, уның яратҡан эше менән шөғөлләнергә ваҡыты етте. Яратҡан эше килем дә килтерһә, бигерәк тә яҡшы», – тип уртаҡлашты эшҡыуарҙың ҡатыны Эльвира.

- Бындай программалар кәрәк. Республика һәм район ярҙамы алған таныш эшҡыуарҙарым бик күп. Улар артабан да үҫешә, - ти Илшат Зиннуров.