“Марсиан”дар Башҡортостан Башлығын һайлай!

Тиҫтәләгән генә өйҙән торған бәләкәй ауылда күберәк хаҡлы ялдағылар  йәшәй. Уларҙың араһында иң өлкән “марсиан” – Миңнислам Өмөтбаев, уға 87 йәш. Һайлауҙарҙа һәр саҡ әүҙемлек күрһәтә.

• Элек ауыл гөрләп торҙо, кеше күп булды. Беҙҙең йәштәштәр генә ун бишләп ине. Ауылда мәктәп булманы, һәр быуын балалары күрше ауылдарҙа уҡыны. Һайлауҙар бер ҙур байрамға әйләнә торғайны. Гармун уйнап, йыр-бейеүҙәр менән, аттарҙа йөрөп үтер ине. Әлбиттә, әле лә бошоноп ятмайбыҙ. Тик тормайбыҙ. Теләгем шул: ергә тыныслыҡ килһен, махсус хәрби операциялағы ир-егеттәребеҙ тиҙерәк еңеү менән, иҫән-һау әйләнеп ҡайтһындар. Балаларыбыҙҙың, ейән-ейәнсәрҙәребеҙҙең киләсәге яҡты булһын!

Миңнислам ағай, үҙ йәшенә ҡарамаҫтан, етеҙ генә, күҙлекһеҙ генә уҡый-яҙа, үҙ автомобилендә Марс тирәһендәге эштәрен башҡарып йөрөй.

82 йәшлек Ғилминур Ғәлиева ла тик тормай. Өйөн үҙ ҡулы менән бәйләгән төрлө көнкүреш кәрәк-ярағы биҙәй. Әле лә бәйләм менән була. Балалары уны үҙәк район китапханаһына йөрөргә яҙҙырып ҡуйған. Уҡырға, мәғлүмәтле булырға ярата. Талбазыға такси менән йыш ҡына “йән аҙығы” артынан барып ҡайта.

Иң йылмайып торған “марсиан” апай – 78 йәштәге Хәлиҙә Ҡылысова булғандыр. Өйө лә бөхтә, ихатаһы ла сәскәләргә күмелгән. Ейәне Закир өләсәһенең өйөнә һыу үткәрергә әҙерләнеп йөрөй. Бигерәк тә яҡшы, хәҙер йәшәү шарттары тағы ла яҡшырып китер.Ошо уҡ ауылда йәшәгән ҡыҙы менән кейәүе лә килеп, тауыш бирҙеләр.

• “Марс”та йәшәһәк тә, Башҡортостан яҙмышына битараф түгелбеҙ, - ти ауыл халҡы шаярыу ҡатыш.

Ауылда ҡаланан йәйгелеккә генә ҡайтып йәшәүселәр ҙә, даими бында йәшәүселәр ҙә бар. 28 һайлаусыға «Рәхмәт-2024» акцияһының куар-билеттары, беләҙектәр бирелде. Марсиандарға уңыш йылмайһын!