Ленинград блокадаһының фажиғәле көндәре мәңге хәтерҙә

Бөгөн, 27 ғинуар, Рәсәйҙең хәрби дан көнө. Был көндө бынан теүәл 80 йыл элек Ленинград ҡалаһы фашист блокадаһынан тулыһынса азат ителә (1944 йыл). Бөйөк Ватан һуғышы тарихында тәрән эҙ ҡалдырған ошо ҡамалыш ваҡытында ҡалала йәшәүселәр, уны һаҡлаусы яугирҙар иңенә лә  ауыр һынауҙар аша үтергә тура килә

Был ваҡиғаны мәктәптәрҙә лә билдәләп үттеләр. Уҡыусыларға хәтәр йылдар тураһында һөйләнеләр.

Рәшит Назаров исемендәге Талбазы башҡорт гимназияһы ла юбилей датаһы хөрмәтенә «Хәтер шәме»акцияһында ҡатнаша. Еңеү паркындағы «Ауырғазыларға - Ватанды һаҡлаусыларға һәм тыл хеҙмәтсәндәренә»мемориалы янында өмә үткәрҙеләр.

«Хәтерҙә һаҡлау мөһим» интеллектуаль уйынында ла уҡыусылар әүҙем ҡатнашты. Хәтәр йылдар ваҡытында икмәктең көнлөк нормаһы менән таныштылар.  «Блокада икмәге» – арыш онона көрпә, ағас онтағы, ҡарағай ҡайырыһы, обой туҙаны, гидроцеллюлоза ҡушып бешерелгән икмәк. Бер кешегә ул тәүлегенә 125 грамм ғына бирелгән.

Рәсәй хәрби драмаһы, режиссер Владимир Потаповтың Тамара Цинберг повесы буйынса Ленинград блокадаһы тураһындағы төшөргән  «Крик тишины» (6+) фильмын ҡаранылар. Балаларҙың тетрәндергес яҙмышы береһен дә битараф ҡалдырманы.

Ленинград блокадаһы 1941 йылдың 8 сентябренән 1944 йылдың 27 ғинуарына тиклем дауам итә. Ул Бөйөк Ватан һуғышының иң фажиғәле ваҡиғаларының береһе була. Ошо көндән ҡаланы блокадалау башлана, ул 872 көн дауам итә. 600 меңдән ашыу кеше немец ғәскәрҙәре ҡамауында, бер нисә йөҙ мең кеше нацистар оккупациялаған өлкәлә ҡот осҡос аслыҡтан үлә.

Был көндәрҙе оноторға тейеш түгелбеҙ.

https://vk.com/club193320245 (Р.Назаров исемендәге Талбазы башҡорт гимназияһы сайты материалы һәм фотолар файҙаланылды).