КӨҘҘӨҢ БЕРЕНСЕ ИРТӘҺЕ МЕНӘН!

Бөгөн - 1 сентябрь. Был ай (лат. September — етенсе) — йылдың туғыҙынсы, көҙҙөң беренсе айы. Сентябрь ғәҙәттә 30 көндән тора. «Сентябрь» исеме «septem» — ете, тигән һүҙҙән алынған. Иҫке Рим календарендә ул етенсе булып килгән. Борон уны славяндар «вересень», башҡорттар «һарысай», тип йөрөтә. Һарысай — алтын миҙгел. Япраҡтар, үлән-ағастар алтынға мансыла. Әбейҙәр сыуағы ла ошо айҙа була. Борон әбейҙәр сыуағына ҡарап көҙҙөң нисек булырын билдәләгәндәр. 22-23 сентябрҙә көҙгө көн менән төндөң тигеҙләнгән көнө була. Был мәлдә ҡояш Төньяҡ ярымшарҙан Көньяҡ ярымшарға күсә — экваторҙы киҫеп үтә. Төньяҡ ярымшарҙа 90 көнгә һуҙылған астрономик көҙ етә. Дуҫтар, һеҙ ҙә ололарҙан ишеткән һынамыш-күҙәтеүҙәрҙе комментарийға яҙығыҙ.

ХАЛЫҠ КАЛЕНДАРЫ

* Сентябрь — йылдың киске эңере.

* Сентябрҙә һыуыҡ булһа ла, тамаҡ туҡ була.

* Уңышһыҙ сентябрь – ҡыштың ҡарһыҙ килгәне.

* Әбейҙәр сыуағында көндәр эҫе торһа, көҙ дымлы була. Әгәр Әбейҙәр сыуағы ямғырлы булһа, көҙ ҡоро килер.

* Әбейҙәр сыуағында үрмәкес ауы күп булһа, көҙ аяҙ һәм йылы булыр, әммә ҡыш һыуыҡ килер.

* Сентябрҙә йәшен йәшнәһә, көҙ оҙайлы һәм йылы булыр.

* Сентябрҙәге иртәнге томандар — бәшмәк миҙгеле башланыуға ишара.

* Әлморондың бешеүе — көҙҙөң етеүе.

* Күктәге болоттарҙың ҡанат кеүек булып йөҙөүе — ҡоштарҙың йылы яҡҡа осоуына мәл етеүгә ишара.

* Сентябрҙә ҡарабаш турғай сырҡылдаһа, көҙгө ҡунаҡҡа саҡыра.

* Сентябҙә бешкән еләк — ул да булһа, миләш.

* Сентябҙә сәтләүек күп булһа, ҡыш уҫал була.

Автор:Равиля Бардыбаева

Читайте нас:

Новости партнеров

Телефон

834745 (2-18-45)

Электрон почта

[email protected]

Адресы

453480, Аургазинский район, с.Толбазы, ул.Первомайская,10

Реклама хеҙмәте

834745 (2-18-45)

Редакция

834745 (2-18-45)

Кадрҙар бүлеге

834745 (2-18-51)