Киләсәгебеҙ өсөн беҙ яуаплы

1997 йылдан был эште мин алып барам. Алда төп бурыс тип милләтте тәрбиәләү, берләштереү, туплау, барлау, осраштырыу, туғанлыҡ ептәрен нығытыу бурысы ҡуйылды. Бигерәк тә йәштәребеҙгә ныҡ иғтибар бирелде, уларҙа үҙ милләтең менән ғорурланыу хисе уятыу торҙо. Башҡорт теленә, тарихына, шәхестәренә ҡыҙыҡһыныу артты. Бөтә донъя башҡорттары Ҡоролтайын Нияз Мәжитов етәкләгән йылдарҙа башҡорт халҡы мәнфәғәте өсөн эшләнгән эштәр күп һәм төрлө булды, ул алдан атланы, халҡына юл күрһәтте, район ҡоролтай етәкселәренә алда ҡуйылған мәсьәләләрҙе сисеүҙә ҙур ярҙам күрһәтте, үҙ бурысын лайыҡлы үтәне.

1998 йылдың февраль айында районда икенсе ҡоролтай үткәрелде, Өфөнән хөрмәтле ҡунаҡтар, Бөтә донъя башҡорттары ҡоролтайы ағзалары, район етәкселәре ҡатнашлығында был мөһим сара эшлекле үтте, төрлө һәм күп ҡырлы мәсьәләләр күтәрелде, шуларҙың иң мөһиме булып Талбазы ауылында райондың бәләкәй ауылдары балалары өсөн башҡорт гимназияһын асыу торҙо һәм ул тормошҡа ашты. Бөгөнгө көндә яңынан заманса ремонтланып гөрләп эшләүен дауам итә һәм башҡалар.

Районда йәшәгән 35 милләт вәкилдәре менән дуҫ, татыу йәшәп, тарихын, мәҙәниәтен, ғөрөф-ғәҙәттәрен киләсәк быуынға еткереү маҡсатында күп мәғәнәле саралар үткәреүҙән ситтә ҡалмай ҡоролтай.

Башҡарма идаралыҡ эргәһендә Ағинәйҙәр ҡоро булдырҙыҡ. Улар Төрөмбәт, Мораҙым , Турһәгәҙе, Ҡаҙморон ауылдарында маҡсатлы эшләп киттеләр. Улар милләт ғәме менән янып йәшәй, йәшәйешебеҙҙә тәрбиәсе ролендә тора. Ауылдарҙың йөҙөк ҡашы булған гүзәл заттар йыйылып, бер-береһе менән фекер алыша, үҙҙәрен борсоған һорауҙар, көнүҙәк мәсьәләләр хаҡында уртаға һалып һөйләшә, киләсәккә пландар билдәләй, халҡыбыҙ йолаларын тергеҙеүҙә үҙ өлөштәрен индерә. Шулай уҡ ағинәйҙәр йыр-моңдары менән һөйөндөрә, ҡул эштәренә лә оҫта һәм үҙҙәре белгән маһирлыҡтарын башҡаларға өйрәтә. Улар балалар баҡсаларында ла, мәктәптәрҙә лә көтөп алынған тәрбиәселәр, ауыл хакимиәтенә ныҡлы терәк, кәңәшсе һәм ярҙамсылар ҙа.

Башҡарма комитет эргәһендә башҡорт ҡатын-ҡыҙҙары ойошмаһы ла әүҙем эштәр башҡара, етәксеһе Талбазы район дауаханаһының табибы Килмөхәмәтова Лилия Сафа ҡыҙы. Район ҡатын-ҡыҙҙар ойошмаһы менән берлектә Әсәләр көнөнә арналған матур сара үткәрелде, аш-һыу, оҫта ҡулдар күргәҙмәләре, ҡортсолоҡ һәм апитерапия фәнни- тикшереү үҙәге продукциялары һәм башҡалар байрамға мәртәбә өҫтәнеләр.

Башҡортостан Хөкүмәтенең «Шәжәрә байрамдары үткәреү тураһындағы» ҡарары нигеҙендә ауылдарҙа был байрамдарҙы үткәреүгә етди иғтибар бирелә. Ауыл тарихын өйрәнеү, һәр ғаиләнең үҙ шәжәрәһен төҙөү маҡсатында был байрам Түрһәгәҙе ауылында «Туғандарҙың ҡәҙерен беләйек» девизы аҫтында ҙур әҙерлек менән үтте. Һабанаевтар, Раяновтар, Һатлыҡовтар һ.б. туғанлыҡ тамырҙарын барланылар. Йылдан-йыл үҙ тамырҙарын белергә теләүсе ғаиләләрҙең арта барыуы, үҙ асылыбыҙға ҡайтыуыбыҙ шатлыҡлы, әлбиттә.

Михайловка ауыл советы, Мораҙым мәктәбе коллективы, ауыл халҡы менән берлектә Мораҙым мәктәбенең 165 йыллыҡ юбилейын үткәрҙе, мәртәбәле сарала Мораҙым ерлегенән сыҡҡан һәм ошо мәктәпте төрлө йылдарҙа тамамлаусылар осрашты, арҙаҡлы шәхестәре ҡатнашып, тәъҫораттары менән уртаҡлашты, күп тармаҡлы мәҙәниәт усағында профессор, ғалимә, фольклорсы, Салауат Юлаев премияһы лауреаты Фәнүзә Айытбай ҡыҙы Нәҙершинаның ижадына арналған фольклор бүлмәһе асылды.

Районда меркеттәр менән бергә Табын ырыуы вәкилдәре Үтәймулла, Өсмөгөҙ ауылдарында ырыҫлы донъя көтә. Үтәймулла ауылында ла Шәжәрә байрамы үткәрелеп, туғанлыҡ тамырҙары барланды. Күп ғаиләләр үҙҙәренең шәжәрәләрен төҙөнөләр.