Радий позывнойлы яугир: Беҙ барыбыҙ ҙа бер дөйөм эш башҡарабыҙ

– Һеҙ хеҙмәт иткән батальон 2025 йыл йомғаҡтары буйынса иң яҡшыһы тип танылды. Ҡотлайбыҙ.

– Рәхмәт. Ысынлап та, йыл йомғаҡтары буйынса беҙҙең өсөнсө батальон хәрби әҙерлек, яраҡлашыу буйынса иң яҡшыһы тип танылды. Ә бит беҙҙең барыбыҙ ҙа тиерлек Башҡортостандан. Күп нәмә командирҙарға бәйле - улар беҙҙә аныҡ. 2022 йылда Өфөнән автобуста килгәндә – ҡаланың Совет һәм Октябрь райондарынан егеттәр – бер-береһен бөтөнләй белмәйенсә, бергә булырға ҡарар иттеләр. Әлбиттә, ығы–зығы, көсөргәнеш бар ине - алда нимә көтәлер, фронттан килгән мәғлүмәттәрҙе тулҡынланып уҡыйбыҙ, күп нәмә аңлашылмай. Хеҙмәт итеү осоронда, бурыстарҙан сығып, бер аҙ таралдыҡ, әммә төп төркөм шулай тора әле. Беҙ бергә шул тиклем күп ваҡыт эшләйбеҙ: дежурҙа, постта, блиндажда – бер-беребеҙҙе арҡаларыбыҙ менән тоябыҙ. Мин стрелок-санитар булып хеҙмәт итәм. Кемдер снайпер, кемдер дроновод һәм башҡалар.

Бында дуҫлыҡ, ышаныс гражданкаға ҡарағанда башҡаса. Нарядтар араһында ял иткәндә, иптәштәреңдең поста булыуын беләһең, нимә булһа, иҫкәртәләр, күтәрәләр. Тыныс ҡына ял итә алаһың. Әлбиттә, адаптация осоро, бер-беребеҙгә өйрәнеү осоро булды. Тыныс тормошта һәр кемдең үҙ тормошо, үҙ амбициялары, холҡо. Беҙ хәҙер кемдең ҡыҙыу, кемдең шаяртыуҙы ҡабул итмәүен белеп торабыҙ. Армиялағы хеҙмәт тә күпте бирҙе бит.

– Өс йыл ярым эсендә һеҙҙә нимә үҙгәрҙе, МХО нимәгә өйрәтте?

– Һүҙгә тоғролоҡто, яратҡан кешеләргә тоғролоҡто нығыраҡ баһаларға өйрәндем. Был бик мөһим сифат. Беҙҙең күҙ алдында хәрби хеҙмәткәрҙәрҙең ҡайһы берҙәренең ғаиләләре төрлө сәбәптәр арҡаһында емерелде. Ауыр һынау.

Тормошто ҡәҙерләргә өйрәндем. Ысын хәрби хәрәкәттәрҙең кинола күргәнсә түгеллеген һәм фронтта ҡурҡыныс булыуы мөмкинлеген аңлайбыҙ. Хәрби операция - уйын түгел, ҡурҡыу барыһында ла бар, һәм ул тормош, киләсәк өсөн булырға тейеш. Шуға күрә, нимәлер эшләгәндә, һәр саҡ эҙемтәләр тураһында уйлайһың.

Бында күп нәмә асыла - мәҫәлән, кәрәкле мәлдә һинең әхлаҡи-психологик торошоң ни тиклем мөһим булыуы. Бына һиңә хәрби иптәшеңдең тәртибендә нимәлер оҡшамауы мөмкин - йәше йәки рангыһына ҡарамайынса кешегә тупаҫ мөнәсәбәт, кешегә үҙ фекереңде тағырға тырышыу йәки кешенекен һанға һуҡмау. Әммә һин аңлайһың, был – икенсе кеше. Һин - ҡаланыҡы, белемле, ә ул – урам егете. Әммә бер-берегеҙҙе тулыландырғас, уға ҡарата кире ҡараш ниндәй мәғәнәгә эйә? Бәлки, ул һинең тормошоңдоң мөһим кешеһе һәм һине ҡатмарлы минутта ҡотҡарыр, ҡайҙалыр рух төшөнкөлөгөнә бирмәҫ, «Алға!» - тип алып барыр. Беҙ барыбыҙ ҙа бер беребеҙгә ниндәйҙер кимәлдә уҡытыусы, өйрәтеүсе. Бәлки, уның характерында нимәлер мине ярһыта, сөнки мин үҙем шундай булырға теләйем, әммә үҙемә рөхсәт итмәйем? Бәлки, мин уға мөһим кеше, ул миңә ҡарай һәм уйлай: уҡыған булһам ине, тип. Был бик ҡыҙыҡлы тормош һабағы.

– БПЛА операторҙары бөгөн бик мөһимме?

– Бөгөн дрондар - разведка, ут менән юҡ итеү, объектив контроль һәм кәрәк-яраҡты ташыу мөмкинлеге. Бер эш - аяҡ менән йөрөү, икенсеһе – күпкә һөҙөмтәлерәк – «ҡош» осоп китә, хәлде белеп ҡала һәм маршруттың хәүефһеҙлегенә инана. Дошман быға ҙур ставка яһай, беҙгә бирешергә ярамай. Эйе, беҙ бер урында тормайбыҙ, беҙҙә бик күп яҡшы «ҡоштар» - ҙурҙары һәм бәләкәйҙәре, шәп егеттәр – дроноводтар, уларҙың күбеһе бында уҡ уҡып сыҡҡан. Әммә был «ҡоштарға» операторҙар кәрәк. Күптәрҙең быны аңлауы һәм килешеүгә ҡул ҡуйыуы ҡыуаныслы. Сөнки беҙ барыбыҙ ҙа бер дөйөм эш башҡарабыҙ.

–Ғәҙәттә ялығыҙ нисек үтә?

– Отпускты мөмкин тиклем күберәк ғаилә менән үткәрәм. Ҡатыным, балалар, атай-әсәйҙәр менән. Һаулыҡҡа ныҡлы иғтибар бирәм.