Өфө ғалимдары һәм табиптары МХО яугирына хәрби йәрәхәттән һуң ярҙам итте

Башҡорт дәүләт медицина университетының юғары уҡыу йорттары -ара студенттар кампусында аддитив технологиялар лабораторияһы ғалимдары һәм 21-се дәүләт клиник дауаханаһының республика яңаҡ-йөҙ хирургияһы үҙәге табиптары пациентты, махсус хәрби операцияла ҡатнашыусыны, күҙ орбитаһын реконструкциялау юлы менән күҙ соҡороноң тирә-яғын һәм күҙ тирәһе туҡымаларын тергеҙеүҙә ярҙам итә.

Операцияны үткәреүҙең аныҡлығын Рәсәй Һаулыҡ һаҡлау министрлығының БДМУ-ның аддитив технологиялар лабораторияһы ғалимдары тәьмин итте: улар пациенттың йәрәхәт һөҙөмтәһендә барлыҡҡа килгән деформациялы баш һөйәге макетын булдырҙы.

Беренсе этапта ғалимдар пациенттың компьютер томографияһы ярҙамында алынған реаль рентгенологик мәғлүмәттәр менән эшләне. Артабан, үткәрелгән тикшеренеүҙәр нигеҙендә, анатомик структураларҙың ысын үлсәмдәрен һәм пропорцияларын боҙмайынса күрһәтелгән баш һөйәгенең компьютер 3D-моделе эшләнә. Өсөнсө этапта пациенттың тәбиғи ҙурлыҡтағы йөҙ өлөшөнөң тергеҙелгән навигация моделе кәрәкле участкаға сегментлана һәм лабораторияның 3D - принтерында баҫтырыла. Ошонан һуң ғына алынған изделие артабанғы эш өсөн медицина учреждениеһына тапшырылды.

- Операция барышында урынынан күскән бөтә туҡымалар, шул иҫәптән күҙ алмаһы, май күҙәнәксәһе һәм күҙ аҫты нервыһы кире урынына ҡайта. Шулай итеп, йөҙ деформацияһы, күҙҙең аҫҡа төшөүе, һиҙгерлектең кәмеүе бөтөрөлә. Пациенттың баш һөйәгенең тәбиғи макеты операция алдынан кәрәкле имплантты ҡуйыу формаһын һәм тәртибен үҙгәртергә мөмкинлек бирә. Бындай алым операцияны үткәреү ваҡытын кәметә һәм аныҡлыҡ тәьмин итә, - тип һөйләй Башҡортостандың штаттан тыш баш яңаҡ-йөҙ хирургы, юғары категориялы табип, медицина фәндәре кандидаты, доцент Гүзәл Фәйзуллина.

Баш һөйәге макеты ярҙамында күҙ орбитаһының аҫҡы стенаһын реконструкциялау өс пациентҡа үткәрелгән дә инде. Табиптар, 3D -печать менән был алым прогрессив һәм инновацион, тип уртаҡлаша, был хәҙерге медицина практикаһында уның юғары ихтыяжын тыуҙыра.

- Операция яһалған органдың теүәл күсермәһен булдырыу аша бындай һөҙөмтәле алым операцияны дөрөҫ һәм теүәл планлаштырырға ярҙам итә. Баш һөйәге моделе юғары температуралы стерилләштереүгә сыҙаған ныҡлы тотороҡло АБС - фотополимер пластиктан эшләнгән, - тип билдәләне Азат Биләлов, медицина фәндәре кандидаты, травматология һәм травопедия кафедраһы доценты, Рәсәй Һаулыҡ һаҡлау министрлығының Башҡорт дәүләт медицина университетының аддитив технологиялар лабораторияһы проекттары етәксеһе.

Ғалимдар шулай уҡ, сығым материалы стоматология сертификатына эйә булыуын һәм Рәсәйҙә эшләнеүен, уның лабораторияла барлыҡҡа килеүе университеттың Приоритет-2030 үҫеш программаһында ҡатнашыуы арҡаһында мөмкин булғанлығын билдәләй.

Хәтерегеҙгә төшөрәбеҙ, БДМУ-ның аддитив технологиялар лабораторияһы үҙенең эшен республика грантынан башланы, ул ғалим-медиктарға перспективалы материалдар һәм һәр пациентҡа анатомияһына ярашлы имплантаттар әҙерләү технологияларын эшләү буйынса проекттарҙы тормошҡа ашырырға мөмкинлек бирҙе.

- Был миҫал Өфөнөң студенттар кампусын ни өсөн үҫтереүебеҙҙе раҫлай. Беҙ фәндең практик медицинаның бер өлөшө булыуын күрәбеҙ. Фәнни идея ҡотҡарыу имплантына әйләнә. Бында медицинаны үҙгәртеүсе, кешеләргә һаулыҡ һәм ышаныс ҡайтарыусы ҡарарҙар тыуа. Беҙ кеше мәнфәғәте өсөн эшләгән фәнгә ярҙам итеүҙе дауам итәсәкбеҙ, - тип һөйләне Башҡортостан премьер-министры Андрей Назаров үҙенең социаль селтәрҙәрендә был уникаль операция хаҡында.

Пациенттарҙың һаулығын тергеҙеү өсөн 3D - печать ҡулланыу БДМУ – ның аддитив технологиялар лабораторияһы ғалимдарының практик медицина менән тәүге уңышлы хеҙмәттәшлеге түгел.

Лабораторияның иң мөһим проекты - индивидуаль стент-графттар етештереү - ғалимдар операцияны теүәл планлаштырыу өсөн аортаның 3D-моделен төҙөй. Янбаш һәм тубыҡ быуындарына 70-тән ашыу ревизия операцияһы инновацион эшләнмә арҡаһында башҡарыла.