Ауырғазы районы делегацияһы «Һөт иле – баллы башҡала!» фестивалендә ҡатнашты

21 сентябрҙә Өфөнөң «Ҡашҡаҙан» мәҙәниәт һәм ял паркында «Һөт иле – баллы башҡала!» ғаилә фестивале үтте.. Байрам Ғаилә йылына һәм Өфөнөң 450 йыллығына арналды. Майҙансыҡта һөт, бал һәм бал продукцияһы етештереүселәр йыйылды. Унда Ауырғазы районы делегацияһы әүҙем ҡатнашты.

Байрам сиктәрендә Грибушин сәй фестивале лә булды. Был сарала Ауырғазы районы хакимиәте Бөтә донъя башҡорттары ҡоролтайы майҙансығын ойошторҙо. Ауырғазылар тирмә ҡуйҙы. Мәҙәниәт бүлеге начальнигы Булат Баһауетдинов етәкселегендә мәҙәниәт һарайының үҙешмәкәр артистары, «Гөлнәзирә» ансамбле (Мораҙым ауылы) Исмәғил ауылы активистары килде. Һуңғылары быйыл «Айыҡ ауыл»республика конкурсында ҡатнаша.

Ауырғазылар тирмәһе

- Исмәғил ауылында 700-ҙән ашыу кеше йәшәй. Кешеләр дуҫ, улар сәләмәт йәшәү рәүеше өсөн. Проблемалар ҙа бар, әммә төп маҡсатыбыҙ – ауылды төҙөкләндереү һәм халыҡты әүҙем эшмәкәрлеккә йәлеп итеү. Бөгөн 25 ир-атыбыҙ махсус хәрби операция зонаһында. Беҙ уларға һәм уларҙың ғаиләләренә даими ярҙам итергә тырышабыҙ. «Айыҡ ауыл» конкурсының муниципаль этабы ноябрь аҙағына тиклем бара. Республика этабында ҡатнашырға теләйбеҙ.

Исмәғил ауыл биләмәһе башлығы Илфат Ғәзизов

. Беҙҙең тирмә ҡунаҡтарҙы сағыулығы, бай биҙәлеше менән йәлеп итте. Унда бик матур һәм уңайлы булды. Көндәлек көнкүреш әйберҙәре, боронғо эш ҡоралдары, һөнәрселек әйберҙәре, ҡул эштәре ҡунаҡтарҙы хайран ҡалдырҙы.
Бауырһаҡ, гөбәҙиә, ҡоймаҡ һәм башҡа милли аҙыҡтарҙан өҫтәл һығылып тора. Сәй яратыусылар төмле эсемлек менән һыйланды.

Оҫталарҙың эшен күҙәтеү ҡыҙыҡлы булды. Мораҙым ауылынан Әлфинур Смаҡова туҡыу станогында келәм эшләү буйынса оҫталыҡ дәресе күрһәтте. Ҡунаҡтар биҙәүестәр өсөн тәңкәләр һуғыуҙы күҙәтте. Әлмира Батталова тирмә һәм башҡорттарҙың ғөрөф-ғәҙәттәре менән таныштырҙы.

Мораҙым ауылынан Әлфинур Смаҡова оҫталыҡ дәресе күрһәтте.

Фестиваль профессиональ флайбордистарҙың - осоусы кешеләрҙең экстремаль көндөҙгө һәм киске шоуҙары менән һоҡландырҙы! Төрлө интерактив майҙансыҡтар эшләне: фермер баҙары, сыр кибете, гастрономия зонаһы. Балалар һәм өлкәндәр өсөн фотозоналар, оҫталыҡ дәрестәре, мауыҡтырғыс уйындар ойошторолдо.

Байрамда бөтәһе 40 һөт һәм һөт продукцияһы етештереүсе, шул иҫәптән 17 крафт сырҙары етештереүсе, 46 фермер хужалығы үҙ продукцияһын тәҡдим итте. «Бал йәрминкәһендә» республиканың 20 районынан 41 умартасы ҡатнашты. Сарала 10 тонна бал һатылған.

Радий Хәбиров: «Һөт иле» фестивален яратабыҙ, был - сағыу ғаилә байрамы, ә етештереүселәр өсөн бизнеста этәргес. Башҡортостандың ысын һөт иле булыуы бәхәсһеҙ. 2023 йылда беҙҙә 784 мең тонна һөт етештерелгән, 2024 йылдың 8 айында – 544 мең тонна. Эшкәртеү яҡшы үҫешкән-был өлкәлә 50 предприятие йәлеп ителгән. «Һөт иле»ндә беҙҙең һөт заводтары, фермерҙар, сыр, башҡа аҙыҡ-түлек етештереүселәр ҡатнаша. Быйыл фестиваль программаһына бал йәрминкәһе өҫтәлде.